Япония бош вазири Синдзо Абэнинг Исроил бош вазири Беньямин Нетаньяху қароргоҳидаги тантанали қабули Нетаньяхунинг шахсий ошпази сабабли хижолатбозлик билан тугади.
Ошпаз Моше Сегев меҳмонларга оддий идиш ўрнига туфли ичига жойлаштирилган ўзига хос ширинлик тортиқ қилган. Бироқ япон делегацияси ва Японияда ишлаган Исроил дипломатик корпуси вакиллари кўринишича япон маданияти билан яхши таниш бўлмаган ошпазнинг бу “ўзига хослиги”дан хурсанд бўлишмаган.
Гап шундаки, япон анъаналарида жуда кам нарса кўча пойабзалидан ҳақоратомузроқ қабул қилинади. Бундай пойабзалда уйга, ресторанга кирилмайди ва унда ҳаттоки ишхонада ҳам юрилмайди. Дипломатик корпус вакиллари ушбу вазиятни художўй яҳудийга чўчқа шаклида ишланган идишда шоколад беришга қиёслашган.
“Бу аҳмоқона ва бетакаллуф қарор бўлган. Япон маданиятида пойабзалдан кўра кўпроқ ҳазар қилинадиган нарса йўқ. Японлар пойабзалда нафақат уйга киришади, уни ҳаттоки офисда кийиб юришмайди. Ҳаттоки бош вазир, вазирлар ва парламент аъзолари ҳам ишда кўча пойабзалини кийиб юришмайди”, деб айтган Японияда ишлаган исроиллик дипломат.
Можародан кейин ошпаз берган баёнотида ширинлик ҳақиқий туфлида эмас, балки Япония бош вазири учун махсус яратилган туфли шаклидаги металл идишда берилганини маълум қилган.
