Европа Чемпионлар лигасидаги 4 гуруҳда 6-тур учрашувлари якунланди. «Ливерпуль» ўзи учун курашиб, плей-оффга йўл олди.
«Ливерпуль» (Англия) - «Наполи» (Италия) - 1:0 (1:0)
Гол: Салоҳ, 34.
«Ливерпуль»: Алиссон, Александр-Арнолд (Ловрен, 90), Матип, ван Дейк, Робертсон, Вейналдум, Ҳендерсон, Милнер (Фабинью, 85), Салоҳ, Роберто Фирминьо (Кейта, 79), Мане.
«Наполи»: Оспина, Максимович, Альбиоль, Кулибали, Мариу Руй (Гулям, 70), Аллан, Ҳамшик, Руис (Зелиньски, 62), Каллежон, Мертенс (Милик, 67), Инсинье.
Огоҳлантиришлар: Ван Дейк, 13. Кулибали, 40. Салоҳ, 83. Робертсон, 90+1. Мане, 90+3.
Ҳакам: Скомина (Словения).
11 декабрь. Ливерпуль. «Энфилд» стадиони.
Чемпионлар лигасининг ҳеч бир гуруҳида охирги тур арафасида C гуруҳидаги каби интрига йўқ эди. Тўрт жамоада ҳам охирги тур натижаларига кўра, баҳорда еврокубоклардаги иштирокини таъминлаш учун имконият мавжуд эди. «Наполи» 9 очко билан етакчи, «ПСЖ» 8 очко билан иккинчи, «Ливерпуль» 6 очко билан учинчи эди. 4 очкоси бор «Црвена Звезда»да ҳам бошқа ўйинлар натижаларига кўра учинчи ўринни эгаллаб, Европа Лигасига йўлланма олиш умиди сақланиб қолганди.
Бир неча кун муқаддам Премьер-лигада «Сити»ни қувиб ўтиб, турнир жадвали пешқадамига айланиб олган мерсисайдликларни «Наполи»га қарши ўйинда шунчаки ғалаба эмас, гол ўтказмасдан ғалаба қозониш қониқтирарди (меҳмонларнинг 2:1, 3:2, 4:3 ва ҳоказо кўринишдаги бир гол фарқли ғалабалари мезбонларни кейинги босқичга олиб чиқарди).
Параллел кечадиган учрашувда «ПСЖ» ғалаба қозониши деярли аниқ бўлгани туфайли, «Ливерпуль»ни камида 1:0 ҳисобидаги ғалаба (ёки 2 тўп фарқи билан ғалабалар) қониқтирарди ва айнан шу ҳисобдаги ғалабага эришилди. Дуранг ҳам қониқтирадиган неаполитанликлар жамоаси мураббийи Карло Анчелотти эса ўйин олдидан камтарлик қилиб ўтирмади. «Биз торт тайёрладик, энди устига қиём суртиш қолди. Агар плей-оффга чиқмасак, тентакмиз», деди у.
Клопп эса бу сафар жиддий эди: «Бизда «Наполи»га қарши ўйин. Англия чемпионатида пешқадам бўлиб олганимизни унутиб турамиз».
Анчелоттининг сўзларидан келиб чиқиб айтадиган бўлсак, энди «Наполи» футболчиларини тентак деб аташимиз мумкин. Аслида, бу оқшом майдонда «Ливерпуль» ҳам, «Наполи» ҳам юқори даражадаги футболни намойиш этишди. Бу ЕЧЛ плей-офф босқичига муносиб ўйин эди.
Ўша Салоҳ
Икки томоннинг ҳам иштиёқи жуда баланд эди. Бу илк дақиқаларданоқ кўриниб турарди: Салоҳ, Ҳамшик ва Милнерда голли вазиятлар юзага келди. Кимгадир аниқлик, кимгадир омад етишмади. Кетма-кет ҳужумлар уюштирилди, аввалига бу ўйин худди 4:4 ҳисоби қайд этиладигандек туюлди. Аммо «Ливерпуль»нинг ўзи темпни тушириб қўйди. 13-дақиқада Виржийл ван Дейк Дрис Мертенснинг оёғини синдирай деди, мезбонлар сардори Ҳендерсон нидерландиялик ҳимоячига важоҳат билан ташланди, ҳакам эса фақат сариқ карточка билан кифояланди. Лекин ўйин темпи ўлди.
АПЛда Клопп одатда 4-2-3-1 ёки 4-4-2 схемасини қўллайди. ЕЧЛда эса ўтган мавсумдаги каби 4-3-3 схемасидан фойдаланилмоқда.
Анчелотти ўйинга 4-3-3 схемаси билан тушганди, тўпсиз ҳолатда футболчилар 4-2-2-2 схемасига ўтишди. Қанотдаги икки футболчи ҳам «Ливерпуль»нинг ҳужумларини бузиш билан машғул бўлишди. Ҳимоячилар офсайд чизиғида моҳирона ҳаракатланишди - шундай вазиятларда Мане офсайддан урган голини нишонлаётганида ҳакам Дамир Скомина голни бекор қилди.
Аммо «Ливерпуль» барибир гол урди. Бу шундай сценарий билан рўй бердики, бу вазиятда доно Анчелотти ҳеч нарса ўйлаб топа олмасди. Ўтган ҳафтада «Борнмут» дарвозасига 3та гол йўллаган Муҳаммад Салоҳ бу кеча ҳам ўйинда эди. Голдан бир дақиқа олдинги ҳужумда Салоҳ дарвоза чизиғи томон олдиндан кутилган узатма берди ва тўп осонгина қайтарилди. Иккинчи ҳужум вақтида эса у кутилмаганда, одатдаги каби пас бериш ўрнига ўткир бурчакдан туриб дарвозабоннинг яқин бурчагига зарба йўллади. Салоҳнинг ностандарт қарори ва дарвозабоннинг хатоси - бу вазиятда иккита Анчелотти ҳам ҳеч нарса қила олмасди. Ҳақиқий Салоҳ қайтди!
Биринчи бўлимда Юрген Клопп шогирдлари зарбалар бериш борасида фаолроқ эди - 7:3 (аниқ зарбалар бўйича 1:1). Иккинчи бўлимда қизилларнинг бу борадаги фаоллиги каррасига ўсди - 15:5 (аниқ зарбалар бўйича 3:2).
«Неапол» етарлича агрессия намойиш этолмади. Биринчи бўлимда фақат бир марта аниқ зарба йўлланди - Мертенснинг деярли майдон марказидан йўллаган кучсиз зарбаси.
Клопп юқори прессинги билан рақибнинг ўз севимли услубида қарши ҳужумларга ўтишига йўл қўймади.
Анчелотти фақат охирги 20 дақиқаликда таваккал қилишга мажбур бўлди. Фабиан Руис ўрнига Зелиньски, Мертенс ўрнига Милик, Мариу Руй ўрнига ҳужумкор Февзи Ғулом туширилди.
Алиссонга - ҳайкал!
Клоппни мухлислар натижа учун ўйнамасликда айблашлари мумкин. Мухлислар бундан норози бўлишсада, «Ливерпуль» бу ўйинда ҳам ҳисобни сақлаб қолишга эмас, ҳисобни ошириш учун ўйнади. «Наполи»да эса иккинчи бўлимда майдонга чиққан Аркадиуш Милик ва Зелиньски қолган 20 дақиқалик қизиқарли ўтишини таъминлашди. «Энфилд»га йиғилганлар 87-дақиқада Маненинг яккама-якка вазиятда гол уролмаслигидан кейин юрагини ҳовучлаб ўтирганида, қўшимча дақиқалар давом этаётганида Фабиньо Миликка узатилган тўпни тўсиб қололмади ва польшалик ҳужумчи Алиссон қаршисида қолди. Аммо Алиссон метин қояга айланди.
Alisson Becker. 90+2 😱😅pic.twitter.com/mzlGnvEKf9
— Betsson 🇸🇪 (@BetssonSV) 11 декабря 2018 г.
Қолган дақиқалар ичида Мане яна бир марта голли вазиятни кўкка совурди ва ҳисоб ўзгармай қолди. Аслида бу ўйинда камида ўнта гол бўлиши керак эди. Камида.
