БАА хоккей клубларидан бири 2021 йилда Континенталь хоккей лигасига киритилиши, унга Александр Овечкин ва Евгений Малкин каби таниқли спортчилар жалб этилиши мумкин. Бу ҳақда Амирлик хоккей лигаси (EHL) раҳбари, россиялик бизнесмен Владимир Бурдун маълум қилди.
«КХЛ билан гаплашдимми? Очиғини айтаман, ҳали учрашганимиз йўқ. Негалигини тушунтирсам, КХЛ билан музокара ўтказишдан олдин биз ўзимиз АХЛнинг ичида тартиб ўрнатиб олишимиз керак.
Клубни Дубайнинг «Лас-Вегас Найтс»ига айлантириш биз учун қийин иш эмас. КХЛ билан келишиб олсак, Миллий хоккей лигаси (NHL)нинг собиқ юлдузларидан жамоа тузишимиз аниқ ва у жуда тез орада натижа келтира бошлайди.
БААда Дацюк ва Мозякин даражасидаги футболчилар ўйнайдими? Ўйлашимча, улар бизнинг жамоада бемалол ўйнай олишади. Биз келгусида NHL’дан қайтадиган Александр Овечкин ва Евгений Малкинни ҳам кузатяпмиз. Улар билан гаплашиб, битим шартларини муҳокама қилиб олишга тайёрмиз.
Ишончим комилки, NHL’да ўйнаган россияликларнинг кўпи катта мамнуният билан Дубайга келишади, бу ерда ҳаёт даражаси умуман бошқача.
Жамоаларнинг номланиши? Бир нечта вариантларни кўриб чиқяпмиз. Бизга қарашли «Кучли туялар» жамоаси бор, БААда хоккей 1994 йилда шу клуб билан бошланган. Эҳтимол, айнан у КХЛ таркибига кирар. Бу 2021 йилдаёқ амалга ошишига умид қиляпман. Бошқа йўлдан кетишимиз ҳам мумкин, бизда бир нечта вариантлар бор», – деган Бурдуннинг сўзларини келтирмоқда «Р-Спорт».
Маълумот учун, Континенталь хоккей лигаси – Россия, Беларусь, Қозоғистон, Хитой, Латвия, Словакия ва Финляндия клубларини бирлаштирган чемпионат бўлиб, унинг 2018/19 мавсумида санаб ўтилган давлатлардан жами 25та жамоа қатнашмоқда.
Эслатиб ўтамиз. кейинги вақтларда Ўзбекистонда ҳам хоккейни ривожлантириш ҳаракатлари жонланган. 2018 йилда хоккей федерацияси ташкил этилди, шу йил февраль ойидан бошлаб 4та клуб иштирокида биринчи Ўзбекистон чемпионати бошланди.
Ўтган ҳафта Ўзбекистон хоккей федерациясига аъзо бўлиш учун ариза бериши маълум бўлганди. Кеча, 19 февралда ЎХФ президенти Бахтиёр Фозилов Москвада Континенталь хоккей лигаси бошқаруви раиси Дмитрий Чернишенко билан учрашди.
