Ўзбекистон президенти топшириғи асосида эндиликда Халқ қабулхоналари ва секторлар раҳбарларининг аҳоли муаммолари билан ишлаши янги стратегия ва тизим асосида ташкил этилмоқда.
Бунда аҳоли билан мулоқот янгича ёндашув – давлат идораларининг бевосита биринчи раҳбарлари энг оғир, энг чекка, энг олис ҳудудларга чиққан ҳолда, маҳаллама-маҳалла, қишлоқма-қишлоқ, кўчама-кўча, уйма-уй юриб, аҳоли муаммоларини ўрганиш асосида ташкил этишга киришилди.
Дастлаб Тошкент вилояти Оҳангарон шаҳридаги «Маданият ва истироҳат боғи»да ташкил қилинган оммавий қабулда Президент Администрацияси, Олий суд, Бош прокуратура, Ички ишлар, Адлия, Соғлиқни сақлаш вазирликлари, Давлат солиқ қўмитаси, Президентнинг Тошкент вилоятидаги Халқ қабулхоналари масъуллари, вилоятдаги секторлар раҳбарлари мурожаатчиларни қабул қилиб, уларни қийнаётган муаммоларга ечим излади.
Оммавий қабуллар давомида давлат солиқ қўмитаси раиси, ички ишлар ва соғлиқни сақлаш вазирлари қабулида узундан узоқ навбатлар ҳосил бўлди. Бу ўз ўзидан мурожаатларнинг асосий қисми айнан мазкур йўналишларга тегишли эканидан далолат беради. Қўшилган қиймат солиғи, ўзгарган солиқ ставкалари, тадбиркорлик субъектларига берилаётган имтиёзлар, шу ва шу каби вазиятларда тушунмовчиликларга дуч келаётган фуқаролар Давлат солиқ қўмитаси раиси билан бевосита мулоқотда бўлишди.
Асли хоразмлик Қизларбиби Алиева ҳам соғлиқни сақлаш вазири қабулида ишга жойлашиш масаласида мурожаат қилди. Бу аёл лаборатория ҳамшираси бўлиб, бир неча йил Хоразм вилоятида ишлаган. Доимий яшаш учун Оҳангарон туманига кўчиб келганидан бери иш сўраб кирмаган тиббиёт муассасаси қолмаган.
Оммавий қабулдаги аҳоли саломатлиги билан боғлиқ мурожаатларнинг асосий қисми тиббиёт муассасаларида даволаниш йўлланмаларини олишдаги муаммолар билан боғлиқ.
Ўзбекистон Республикаси фуқаролигини олиш, паспорт-виза, ички ишлар органлари ходимларининг хатти-ҳаракатлари юзасидан шикоятлар, собиқ ички ишлар органлари ходимларини ишга қайта тиклаш ва ички ишлар органларига ишга кириш, ижтимоий-ҳуқуқий ҳамда маиший масалаларига оид мурожаатлар Ички ишлар вазири қабулида муҳокама этилди.
Қабул жараёнида аниқланган муаммоларни жойида ечиш чоралари кўрилиб, ҳал этилиши вақт талаб этадиган ҳолатлардагина аниқ муддат ва масъуллар белгиланиб, ижроси назоратга олиниб, ушбу ҳақда аҳоли билан зарур тушунтириш ишлари олиб борилди.
Оҳангарон шаҳридаги «Маданият ва истироҳат боғи»да ташкил қилинган оммавий қабулдан сўнг аҳоли муаммоларини ўрганишда секторлар раҳбарлари Оҳангароннинг энг олис, чекка ҳудудларига бўлиниб, бевосита жойларга чиқиб, қабуллар ўтказди. «Телов» маҳалла фуқаролар йиғини Оҳангарон шаҳридан қарийб 30 км узоқда жойлашган. Бош прокурор ва вилоят прокурори мазкур ҳудудда аҳоли билан юзма-юз, очиқ мулоқот ўтказди.
Телов қишлоғининг Қизилой маҳалласи раиси масъулларга учта масалани ҳал қилиш бўйича мурожаат қилди. Булар – ичимлик сувини яхшилаш, электр таъминотидаги узилишларга барҳам бериш, хусусан, 1960 йилда қурилган трансформаторни янгилаш ҳамда қишлоқ врачлик пунктининг ўз ўрнига қайтарилишига оид масалалар. Маҳалла раисининг уч мурожаати ҳам асосли экани айтилиб, улар бирма-бир ҳал қилинадиган бўлди.
Абдумажид Алиқулов ўз мурожаатида ҳудуддаги 9 маҳаллага мўлжалланган ягона масжид таъмирталаб эканини, янги масжид қуриш учун жой муаммо бўлиб келаётганини айтди. Муаммо ўрганилгач, мазкур ҳудудда яна бир масжид қуриш учун жой ажратиладиган бўлди.
Санам маҳалласи аҳлини кўп йилдан бери мактабгача таълим муассасаси йўқлиги қийнаб келади. Маҳалла аҳли мазкур ҳудудда боғча ташкил этишда амалий ёрдам сўради. Ваҳоланки, биргина шу маҳалланинг ўзида боғча ёшидаги 300 нафардан зиёд бола бор. Бу масала ҳам ижобий ҳал этиладиган бўлди.
Теловга иш билан келган бекободлик Нўмонжон Деҳқонбоев оммавий қабул хабарини эшитиб, мутасаддиларга кредит масаласида мурожаат қилди. Олти йилдан бери тадбиркорлик қилиб келаётган Нўмонжон аканинг айтишича, у 2017 йилда Бекобод шаҳридаги Қишлоқ Қурилиш Банк филиали билан сутни қайта ишлаш ҳамда тикув цехи ташкил қилиш бўйича лойиҳасини молиялаштириш учун 750 миллион сўмлик кредит шартномасини имзолаган. Аммо банк кредитнинг фақат 100 миллон сўмини берган, холос. Қолган 600 миллион сўм бедарак кетган. Нўмонжон Деҳқонбоевни шунча вақтдан бери қийнаб келган муаммога Телов қишлоғидаги очиқ мулоқотда ечим топилди.
Ўзбекистон Республикаси ички ишлар вазири Оҳангарон туманининг энг чекка қишлоқларидан бири – Гулободда оммавий қабул ўтказди.
Аҳоли қишлоқда мактабгача таълим муассасаси йўқлигидан қийналади. Айни вақтда бу ҳудудда 187 нафар боғча ёшидаги болалар мавжуд. Улар мактабгача таълимга қамраб олинса, 150дан ортиқ аёллар ўз меҳнат фаолиятларини давом эттиришлари мумкин.
Қабулда ижтимоий инфратузилмалар боғлиқ муаммони тегишли вазирлик ва идораларга етказилиши ва аниқ ечим ҳақида тез кунларда туман мутасаддиларига топшириқ берилиши ҳақида айтилди.
Шунингдек, ноҳақ айбловлар билан ички ишлар тизимидан четлаштирилган собиқ ходимларни ишга қайтариш масаласидаги мурожаатлар ҳам кўриб чиқилди ва 5 нафар ходим қайта ишга тикланди.
Оҳангарон туманининг Шодмалик маҳалласида Олий суд раисининг сайёр қабули бўлиб ўтди. Суд-ҳуқуқ тизимига оид 20дан ортиқ мурожаатлар юзасидан назорат ўрнатилиши қайд этилди ва 21та мурожаат бўйича асослантирилган ҳуқуқий тушунтириш берилди.
Тошкент вилоятида ўтказилган оммавий қабулларда суд-ҳуқуқ масалаларида ҳам қатор мурожаатлар бўлган эди. Мазкур мурожаатлар ўрганиб чиқилиши натижасида Жиноят ишлари бўйича Оҳангарон шаҳар суди 12 нафар маҳкумни суд залидан озод қилиш бўйича қарор қабул қилди. Президент Халқ қабулхоналарига мурожаатлари натижасида ўз ҳаётини ўнглаб олиши учун яна бир бор имкон берилган бу инсонлар ва оила аъзоларининг ҳаётга, яшашга бўлган ишончлари янада мустаҳкам бўлди.
Оҳангарон шаҳрида ўтказилган оммавий қабулда 427та мурожаат келиб тушди. Бундан Олий судга 152та, Бош прокуратурага - 105та, Ички ишлар вазирлигига - 67та, Адлия вазирлигига - 26та, Соғлиқни сақлаш вазирлигига - 23та, Бандликка кўмаклашиш марказига - 16та, Давлат солиқ қўмитасига - 14та, Ер ресурлари кадастр қўмитасига - 13та, Марказий банкка - 11та масала келиб тушди.
Бундан ташқари, қишлоқма-қишлоқ юриб ўтказилган қабуллар жараёнида Бош прокурор Ниғматилла Йўлдошев, бандлик ва меҳнат муносабатлари вазири Шерзод Кудбиев Телов қишлоғида 32 фуқарони қабул қилиб, улар кўтарган масалалардан 20тасини жойида ҳал этди.
Ички ишлар вазири, Олий суд раиси, Ер ресурслари, геодезия, картография ва давлат кадастри давлат қўмитаси раиси Шодмалик қишоғида 35 нафар, «Гулобод» қишлоғида 29 нафар фуқарони қабул қилиб, жами келиб тушган 42та масалани жойида ҳал қилди.
Давлат солиқ қўмитаси раиси ва Соғлиқни сақлаш вазири Марказий қўрғон ҳудуди «Увак» қишлоғида 29 нафар фуқаронинг мурожаатини кўриб чиқиб, уларда кўтарилган 30дан зиёд масаланинг 15тасини жойида қаноатлантирди.
Судлар томонидан Оҳангарон шаҳри маҳаллалари ва қишлоқларида ўтказилган оммавий қабуллар натижасида 95 нафар фуқаро суд залидан озод қилинди, 10 нафар жазо ўтаётган шахснинг жазосини енгилроғига алмаштирилиб, жазони ўташ жойларидан озод қилинди.
Қабуллар жараёнида фуқаролар томонидан асосан ишга қайта тиклаш, фуқаролиги бўлмаган шахсларнинг доимий рўйхатга қўйиш, бузиб ташланган уй-жойи учун компенсация тўлаш, жазо муддатини ўтаётган шахсларни афв этиш, суд қарорлари устидан норозилик, уй-жой ажратиш ва моддий ёрдам кўрсатиш каби масалалар кўтарилди.
Қабуллар жараёнида жами 552та мурожаат келиб тушди, улардан 184таси (33 фоиз) жойида ҳал этилди. Қолган мурожаатларнинг ижроси назоратга олинди.
