ОАВда Хитойда коронавирусдан вафот этганларнинг ҳақиқий сони расмий маълумотлардагидан 80 марта кўпроқни ташкил қилиши мумкинлиги ҳақида сохта хабар тарқалди.
2 февраль куни интернетда гўёки Хитойдаги Tencent компанияси сайтида коронавирус билан боғлиқ карахт қилувчи рақамлар эълон қилиб юборилгани, унга кўра 1 февраль кунига келиб вирусдан 154 минг киши касаллангани, 24,5 минг киши вафот этгани, яъни қурбонлар сони расмий статистикада кўрсатилаётгандан 80 марта кўпроқлиги ҳақида хато маълумот тарқатилди.
Бунга асос сифатида гўёки сайтдан олинган скриншотлар келтирилди. Аммо маълум бўлишича, бу скриншот фотошоп маҳсули бўлиб, Tencent компаниясида аслида бундай маълумотлар тарқатилмаган.
Сўнгги расмий маълумотларга кўра, Хитойда коронавирусдан 636 киши вафот этган, 31161 киши вирусни юқтириб олган.
