Шавкат Мирзиёев: Шароит яхши бўлмагунича, бирорта раҳбар, мен бошчилигимда, ҳеч қаёққа кетмайди
Президент Шавкат Мирзиёев Сардоба сув омборида юз берган авариядан сўнг Сирдарё вилоятига бориб, Оқолтин туманида аҳоли вакиллари билан учрашди.
![](https://storage.kun.uz/source/6/xWXJWVovVwkWPl0HVsSJCE9zN5UWOFeK.jpg)
Ёмғир ёғиб, кучли шамол бўлгани сабабли 1 май куни эрталаб Сардоба сув омбори тўғонининг бир қисми ўпирилиши оқибатида сув оқими аҳоли пунктлари, коммуникация тармоқлари ва қишлоқ хўжалиги майдонларига катта зарар етди.
Давлат раҳбари зудлик билан воқеа жойига етиб борди. Ҳукумат комиссияси ташкил этилиб, фавқулодда вазият оқибатларини бартараф этиш, аҳолини хавфсиз ҳудудларга эвакуация қилиш ва уларга ҳар томонлама ёрдам бериш бўйича барча чора-тадбирлар кўрилди.
Президент Оқолтин туманида аҳоли билан учрашиб, офатдан жабрланган ҳар бир инсон алоҳида эътиборга олиниши, ҳамма уй-жой ва озиқ-овқат билан таъминланишини таъкидлади.
«Бу ҳеч ким кутмаган синов. Биринчи ҳаракатимиз одамларни эҳтиёт жойларга кўчириш бўлди. Энг катта масала – ўлим бўлмаслиги. Оқсоқоллар, маҳалла раислари ва нозирларидан илтимос қиламан: одамларни йиғиб, уйларга, палаткаларга жойлаштириб, озиқ-овқат билан таъминлаб, маҳаллама-маҳалла саранжом қилиб олишимиз керак. Бунинг учун ҳамма куч ва воситаларни сафарбар қиламиз. Шароит яхши бўлмагунча бирорта раҳбар кетмайди. Сабр қилиб, оғирликни елкамизга олиб, чидашимиз керак. Биронта хонадон, биронта одам эътиборсиз қолмайди», деди Шавкат Мирзиёев.
Тезкор чора-тадбирларга Фавқулодда вазиятлар вазирлиги, Сув хўжалиги вазирлиги, маҳаллий ҳокимликлар, қурилиш-таъмирлаш ташкилотлари, ҳуқуқ-тартибот идоралари ва бошқа хизматлар мутахассислари сафарбар этилди. Сув омбори яқинидаги маҳаллалар аҳолиси хавфсиз ҳудудларга эвакуация қилинди. Жумладан, туманларда ташкил этилган махсус штаблар томонидан мактаб, коллеж, корхона ва хонадонларга жойлаштирилди.
Шунингдек, Мудофаа вазирлиги шахсий таркиби ва махсус техникалари аҳолини эвакуация қилиш ва тегишли хўжалик объектларини жиҳозлаш учун сафарбар қилинди. Ички ишлар вазирлиги ва Миллий гвардиянинг Сирдарё ва Жиззах вилоятлари ҳудудий бошқармалари эвакуацияга кўмаклашиш, тартибни сақлаш ишларига жалб этилди.
Президент Сардоба сув омбори тўғони очилган жойга бориб, уни кўздан кечирди. Ҳукумат комиссияси ва мутахассислар билан муҳокама қилган ҳолда сув оқимини тўхтатиш учун зарур куч ва воситалар жалб қилинди.
Ҳозирда тўғондан сув чиқиши тўхтаган. Тошган сув оқими Оқолтин туманидан ўтувчи Абай каналига туширилиб, Жиззах вилоятидаги Арнасой кўлига йўналтирилган.
Президент вазиятни шахсий назоратга олган.
Давлат раҳбари Сирдарё вилоятида бўлиб турибди.
Мавзуга оид
![](https://storage.kun.uz/source/thumbnails/_medium/10/9e76F65P56yz7wLeWRBRtk1sHOpQoUF7_medium.jpg)
10:10 / 06.09.2024
Шавкат Мирзиёев ФАО билан стратегик шериклик бўйича дастур қабул қилиш муҳимлигини таъкидлади
![](https://storage.kun.uz/source/thumbnails/_medium/10/LyU3w8UT610YdhZ5cifPO46hh2y42Ec6_medium.jpg)
07:50 / 06.09.2024
Мирзиёев ХХР билан ҳамкорлик салоҳиятини амалга ошириш тарафдори эканини билдирди
![](https://storage.kun.uz/source/thumbnails/_medium/10/4kHAifcYxXW_gj4bclwr4NavuUFJMzpF_medium.jpg)
14:00 / 05.09.2024
Автомобил аккумулятори чиқиндисини утилизация қилиш тизими жорий этилиши мумкин
![](https://storage.kun.uz/source/thumbnails/_medium/10/myUrB8FaWc2AZGQwqyr8Ioflan3GKa_z_medium.jpg)
13:56 / 05.09.2024