Олий мажлис қонунчилик палатаси депутати Расул Кушербаев «ЎзавтоМоторс» АЖнинг Солиқ кодексига биноан тўлаши керак бўлган 582.6 млрд. сўм маблағни тўламай келаётгани юзасидан фикрини билдирди.
Маълумот учун, аввалроқ «ЎзавтоМоторс» АЖ томонидан Солиқ кодексига биноан тўланиши керак бўлган йиғим пули (582.6 млрд. сўм) 2020 йил давомида тўланмасдан келинаётгани маълум қилинди.
Депутат бу борадаги фикрларини телеграм канали орқали қуйидагича ифодалаган:
«Республика бўйича фаолият юритаётган жами 10008 та мактабдан 1752 таси мукаммал таъмирга муҳтож, 1228 та мактабларда ўқувчиларнинг қатнов даражаси 1.8 коэффициентдан юқори.
Мамлакат келажаги, Ватан равнақи учун биринчи навбатда шундай муаммоларни бюджет ҳисобидан ҳал этиш масаласи турганда бизнинг эркатой, ярим ишлаб чиқарувчи ва ярим савдогар монополчимиз «ЎзавтоМоторс» АЖ «имтиёзли равишда» 2020 йилнинг тўққиз ойи давомида 582.6 млрд. сўм миқдоридаги йиғимни давлат бюджетига тўламаган».
Расул Кушербаев постини «ЎзавтоМоторс» АЖ кейинги йил ҳам 3 фоизлик шундай йиғимни тўламаслик имтиёзини сақлаб қолиши мумкинлигини таъкидлаган ҳолда, «биз бундай имтиёз берилишига қаршимиз», – дея якунлайди.
