Тошкентда спорт тиббиёти ходимлари ўртасида спорт мусобақаси ўтказилди

Ўзбекистон президентининг шу йил 30 октябрдаги «Cоғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида»ги фармони ижросини таъминлаш мақсадида, 26 декабр куни Миллий олимпия қўмитасининг амалий кўмагида тадбир ўтказилди.

Мусобақада Республика спорт тиббиёти илмий-амалий маркази , федерациялар, болалар ва ўсмирлар спорт мактаби шифокор-массажист ва ўрта тиббий ходимлари ҳамда психолог ва диетологлардан шакллантирилган 4та жамоа иштирок этди.

Тиббиёт ходимлари спортнинг стол тенниси, мини футбол ва бадминтон турлари бўйича, шунингдек малакавий савол-жавоблар (биринчи тез тиббий ёрдамни кўрсатиш) асосида ҳам беллашди.

Жамоалар «Спорт мед», «Ёшлик», «Оптимистлар» ва Тошкент жамоалари номи билан қатнашди.

Маросим очилиши юртимиз мадҳияси садолари остида бошланди. Дастлабки мусобақа – мини футбол турнири Республика спорт тиббиёти илмий-амалий маркази раҳбари Садиков Абдушукур Абдужамилович бошчилигида бошланди.

Тадбир сўнгида Миллий олимпия қўмитаси президенти Рустам Шоабдураҳмонов ва МОҚ вице-президенти Азиз Комилов сўзга чиқиб мусобақа ғолибларини эсдалик совғалари билан тақдирлади.