Агентликнинг фикрича, тендер шартлари адолатсиз, рақобатни чеклайди ва коррупцияга замин яратади. Агар талаблар юмшатилмаса, Ўзбекистон Республикаси манфаатларига «сезиларли даражада зарар етиши» мумкин.
«Coca-Cola Ichimligi Uzbekiston, Ltd» МЧЖ (CCIU) устав фондининг 57,118 фоизга тенг давлат улуши сотувга қўйилиши жараёнлари амалдаги қонунчилик ва тартибларга зид равишда ўтказилаётган бўлиши мумкин.
Коррупцияга қарши курашиш агентлиги шу ҳақдаги мурожаатларни ўрганиб чиққанини маълум қилди.
Аниқланишича, давлатнинг бу компаниядаги улушини сотиш бўйича ўтказилаётган тендернинг бир қатор шартлари савдоларда қатнаша оладиган шахслар доираси кескин кисқаришига ва коррупцияга шароит яратади.
Агентликнинг фикрича, бундай «ўта юқори ва асослантирилмаган талаблар» натижасида тендернинг эҳтимолий иштирокчилари сони сунъий чеклаб қўйилади.
«Эҳтимолий иштирокчилар сонини кескин чеклаш тендер шартларини бажара олувчи кам сонли иштирокчилар ўртасида ҳақиқий рақобат бўлмаслигига ва натижада давлат улушига паст нарх таклиф этилишига ҳамда бунинг оқибатида Ўзбекистон Республикаси иқтисодий манфаатларига сезиларли даражада зарар етказилишига олиб келиши мумкин», – дейилади хабарда.
Идора тегишли органларга қуйидаги чораларни кўриш мақсадга мувофиқлиги юзасидан тақдимнома киритган:
- тендерда етарли рақобатга имконият йўқлиги сабабли уни тўхтатиш;
- тендерга кўпроқ талабгорларни жалб қилиш ҳамда иштирокчиларга тенг имкониятлар яратиш мақсадида халқаро молиявий ва ҳуқуқий маслаҳатчиларнинг хулосалари асосида тендер шартларини юмшатиш.
Эслатиб ўтамиз, Coca Cola Uzbekistan хусусийлашиши ҳақида Давлат активларини бошқариш агентлиги 2020 йил 16 декабрь куни эълон берган эди.
Орадан икки ҳафта ўтиб, компаниядаги давлат улушини сотиб олиш учун 3та таклиф тушгани маълум қилинди.
- Жараёнда молиявий маслаҳатчи сифатида Rothschild & Co инвестиция банки, юридик маслаҳатчи сифатида Dentons юридик фирмаси, ҳисоботлар бўйича KPMG жалб этилган.
- «Coca-Cola Bottlers Uzbekistan, Ltd»даги давлат улушини хусусийлаштириш учун сотиш масаласи 2018 йилдан буён янграб келади.
