Шунчаки ирғитдими ёки совға қилдими? Маълумотлар турлича.
Жорий мавсум «Ювентус» учун яхши кечмаяпти. Туринликлар А Серия етакчиси — «Интер»дан 12 очко ортда қолиб кетишган. Клубдагиларнинг барчаси ҳолатдан қониқиш ҳосил қилишмаяпти: вақти-вақти билан ички зиддиятлар, Андреа Пирло бош мураббийликдан кетиши ҳақида хабарлар чиқиб турибди.
«Ювентус»да барчанинг асаби таранг, шу жумладан, Криштиану Роналду ҳам. Туринликлар етакчиси ёши 36га чиққанига қарамай, Италия чемпионатида 25 гол билан тўпурар бўлиб турибди. Аммо ҳатто у ҳам баъзида асабларини жиловлай олмайди. Масалан, сўнгги турда «Женоа»га қарши ўйиндан кейин Роналду «Юве» футболкасини ечиб майдонга отди.
«Женоа»га қарши ўйиндан кейин нима бўлди?
«Ювентус» ва «Женоа» баҳси туринликларнинг 3:1 ҳисобидаги ғалабаси билан тугади. Роналду ҳаракат қилди, аммо гол ура олмади. Ўйин якунлангач, португалиялик футболчи майдондан чиқиб кетаётганида футболкасини газонга ташлади.
Бу Криштиану билан боғлиқ шундай ҳолатларнинг биринчисимас. Март ойи охирида у Португалия терма жамоаси ўйинидан кейин сардорлик боғичини ечиб, майдонга отганди. Ўшанда Роналду ўйиннинг сўнгги дақиқаларида Сербия терма жамоасига урган голи ҳисобга олинмаганидан аччиқланган ва ҳакам ҳуштаги янграшидан олдин майдонни тарк этганди.
Роналду нега «Юве» футболкасини отди
Роналду «Ювентус»дан кетиши мумкинлиги ҳақидаги миш-мишлар фонида бундай ҳаракатни туринликлар клубига яққол ҳурматсизлик сифатида баҳолаш мумкин. Аввалроқ Calciomercato португалиялик футболчи «Юве»га жуда қимматга тушаётгани ҳақида материал эълон қилганди. Криштианунинг маоши нафақат клубда, балки А Серияда энг юқорисидир. Турли манбаларга кўра, бу миқдор бонуслар қўшилмаганда 30 млн еврони ташкил этади.
Аммо Андреа Пирло барчани хотиржам қилишга шошилди. «Женоа»га қарши ўйиндан кейин у Роналду шунчаки ўз ўйинидан қониқиш ҳосил қилмаганидан шундай қилганини айтди. «Бу нормал ҳолат. У гол уришни жуда истади, қолаверса, жамоа ўйини ҳам истаганимиздек чиқмади. Роналду — ҳақиқий чемпион, у ҳамиша жамоага ёрдам беришни ва ўз изини қолдиришни истайди», — дея қайд этди Пирло.
Andrea Pirlo on Cristiano Ronaldo throwing his jersey away:
— Goal (@goal) April 11, 2021
“It’s normal he wanted to score a goal, especially when the game was getting complicated, as he is a champion and always wants to make his mark." 😖 pic.twitter.com/0QF3VWrkFo
Италиялик журналист Ромео Агрести эса ҳолатни бошқачароқ талқин қилди. Унинг сўзларига кўра, ўйин вақтида тўп узатиб турган болбойлардан бири Криштианудан футболка сўраган. Футболчи эса либосини болбой томонга улоқтирган бўлиши мумкин.
Роналду ўзининг бу ҳаракати бўйича изоҳ бермаган.
