Лукашенконинг сўзларига кўра, пандемия бошланганидан буён ўтган қарийб икки йил давомида Беларусь ЕОИИ мамлакатларига чегараларини ёпмади.
Беларусь президенти Александр Лукашенко Евросиё иқтисодий иттифоқи ҳукуматларининг иттифоқ ҳудудида фуқароларнинг эркин ҳаракатланишига имкон берувчи ҳаракатлар алгоритмини келишиб олиш вақти келганини айтди.
"Евроиттифоққа аъзо мамлакатлар учун чегаралар очилди. Биз нимадан қўрқяпмиз? Биз одамларимизни чегаралардан ўтолмайдиган қилиб қўйдик, бундан ортиғи бўлмайди", - деди у видеоконференция шаклида ўтказилган Евросиё олий иқтисодий кенгашининг навбатдаги йиғилишида.
"Ҳукуматларимизнинг ЕОИИ маконида фуқароларнинг эркин ҳаракатланишини тиклаш бўйича ўзаро ҳаракатлар алгоритмини келишиб олиш вақти келди. Албатта, коронавирус ва бошқа касалликларнинг тарқалишини чеклаш чораларини кўрган ҳолда", - деди Лукашенко.
"Пандемия бошланганидан буён ўтган қарийб икки йил давомида Беларусь сизларга – фуқароларингизга ҳам, хўжалик юритувчи субъектларга ҳам ўз чегараларини ёпмади", деб таъкидлади у.
Бугун, 21 май куни видеоконференция шаклида Евросиё олий иқтисодий кенгашининг навбатдаги йиғилиши бўлиб ўтди. Унда Арманистон бош вазири вазифасини бажарувчи Никол Пашинян, Беларусь президенти Александр Лукашенко, Россия президенти Владимир Путин, Куба президенти Мигел Диас-Канел Бермудес, Ўзбекистон президенти Шавкат Мирзиёев, Қирғизистон президенти Садир Жапаров, Қозоғистон президенти Қосим-Жўмарт Тўқаев, Қозоғистоннинг биринчи президенти Нурсултон Назарбоев ва Евросиё иқтисодий комиссияси раиси Михаил Мясникович иштирок этди.
