Америкалик журналистга интервью берган Владимир Путин АҚШнинг аввалги ва ҳозирги президентларини солиштирди. Шунингдек, «сиз қотилмисиз» деган саволга жавобан, бундай айбловлар уни ҳайрон қолдирмаслигини айтди.
Охирги йилларда АҚШ ва Россия муносабатлари энг қуйи нуқтада турибди, деди Россия президенти Владимир Путин Американинг NBC телеканалига берган интервьюсида. Телеканал ушбу интервьюдан парчани эълон қилди.
Журналистнинг илтимосига биноан Путин Американинг аввалги ва ҳозирги президентларини солиштирди ва "сиз қотилмисиз" деган саволга жавоб беришдан қочди.
Бир неча ой аввал АҚШ президент Жо Байден ABC'га берган интервьюсида журналистнинг «Владимир Путинни қотил деб ҳисоблайсизми?» деган саволига бироз ўйланиб туриб "Ҳа", деб жавоб қайтарганди. Кремлдагилар Америка президентининг бу сўзларини «жуда ёмон» деб атади ва АҚШдаги элчисини чақиртириб олди. Сўнгра Россия ТИВ АҚШ элчиси Жон Салливанга Вашингтонга кетишни тавсия қилди.
«Фаолиятим давомида ҳар тарафдан ва турли йўналишларда ҳар хил баҳона, сабаб, турли калибр ва оғирликдаги ҳужумларга кўникиб қолганман ва бу мени ҳайрон қолдирмайди», – дея жавоб қайтарди Путин NBC'га берган интервьюсида. У қаттиқ гапириш Америка маданиятининг бир қисми эканини қўшимча қилди.
Путин Трампни «ёрқин шахс», Байденни эса «сиёсатчи» деб таърифлади. Путиннинг сўзларига кўра, Байден аввалги президентдан бутунлай фарқ қилади.
«У мутлақо бошқа одам, унинг устунлик ва камчиликлари ҳам мана шунда, аммо амалдаги президент ўйланмаган ҳаракатларни амалга оширмайди, деб умид қиламан», – деди Путин.
NBC 90 дақиқалик тўлиқ интервьюни 14 июн куни намойиш этишни режалаштирган.
Путин ва Байден учрашуви 16 июн куни Женевада бўлиб ўтади.
