Путин Швейцарияда Украина бўйича режалаштирилган анжуманни танқид қилди

Россия президенти Владимир Путин 15-16 июн кунлари Швейцарияда ғарб етакчилари ва Украина президенти Володимир Зеленский иштирокида ўтказилиши режалаштирилган Украина бўйича глобал тинчлик саммитини танқид қилди. Москва Украина бўйича музокараларга тайёр, лекин фақат ўз шартларига кўра, деди Путин 11 апрел, пайшанба куни Беларус раҳбари Александр Лукашенко билан учрашувда. «Бизни таклиф қилишмаяпти, улар рад этишимизни айтмоқда. Лекин яна бир бор таъкидламоқчиманки, биз бунинг тарафдоримиз, лекин бизга ҳақиқатга ҳеч қандай алоқаси бўлмаган схемаларни юклаш форматида эмас», - дея Россия президентидан иқтибос келтиради «Интерфакс».

Швейцариядаги глобал тинчлик саммити 2023 йилда Дания, Саудия Арабистони ва Малтада, шунингдек, 2024 йил 14 январда Давосда бўлиб ўтган Украинада тинчлик ўрнатиш бўйича тўртта конференция каби форматда ўтказилади. Унда Москва вакиллари бўлмайди, чунки Володимир Зеленскийнинг сўзларига кўра, «улар ҳеч нарсани тўсиб қўймасликлари керак». Ўз навбатида, Россиянинг Швейцариядаги элчихонаси Россия томони «бундай тадбирга таклифнома олса ҳам, уни қабул қилмаслигини» билдирди. 

Володимир Зеленскийнинг «тинчлик формуласи» 

Швейцарияда муҳокама қилинадиган мавзулардан бири Володимир Зеленский томонидан таклиф қилинган «тинчлик формуласи» бўлади. Ушбу режада ўн банд, жумладан, Россия қўшинларини Украинанинг бутун ҳудудидан олиб чиқиб кетиш, россиялик ҳарбий жиноятчиларни жазолаш, Россия томонидан Украинага товон тўлаш ва Киевга халқаро хавфсизлик кафолатларини тақдим этиш бор. Москва эгаллаб олинган ҳудудлар устидан назоратни сақлаб қолиш, шунингдек, Украинанинг НАТОга қўшилишдан бош тортиши ва унинг тўлиқ «демилитаризацияси»ни талаб қилмоқда. 

Лукашенко билан суҳбатда Владимир Путин, шунингдек, Россиянинг Украинадаги энергетика объектларига сўнгги ҳужумлари «демилитаризация» жараёнининг бир қисми эканини айтди, чунки бу объектлар мамлакат ҳарбий-саноат комплекси ишига бевосита таъсир қилади. Путин қўшимча қилишича, энергетика объектларига қилинган ҳужумлар Украина Қуролли кучларининг худди шундай ҳужумларига нисбатан мажбурий акс эттирилган чора ҳисобланади, аввалроқ эса Россия армияси, Кремл раҳбари сўзларига кўра, «гуманитар сабабларга кўра» ундан фойдаланмаган.