Сурхондарё вилояти Жарқўрғон туманида фуқарога томорқа учун ер олиб беришни ваъда қилиб пул олган шахс қўлга олинган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.
Маълум қилинишича, Бош прокуратура ҳузуридаги Департамент ҳамда ДХХнинг Сурхондарё вилояти бошқармалари томонидан Жарқўрғон туманида тезкор тадбир ўтказилган. Тадбирда фуқаро А.Ҳ. тумандаги «Н.» фермер хўжалигига қарашли қишлоқ хўжалигида фойдаланиладиган 27 сотих ерни бошқа бир фуқарога томорқа сифатида сотишни режалаштириб, олдиндан 67 миллион сўм олган вақтда ашёвий далиллар билан ушланган.
Қайд этилишича, мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
