Маршал Дўстум жаҳон ҳамжамиятини «Толибон» тузган ҳукуматни тан олмасликка чақирди

Афғонистонлик маршал Абдул Рашид Дўстум жаҳон ҳамжамиятини «Толибон» ҳаракати тузган ҳукуматни тан олмасликка чақирди, деб хабар берди Интерфакс.

«Мен жаҳон ҳамжамияти ва барча қўшниларимизни, айниқса, шимол ва шимоли-ғарбдаги қўшниларимизни Афғонистондаги террорчи давлат, ҳукумати глобал террорчилардан ташкил топган давлатни тан олишга шошилмасликка чақираман», — дейилади Дўстумнинг Twitter’даги мурожаатида.

У шунингдек, БМТга ҳам мурожаат қилган.

«Мен БМТдан жим турмаслигини сўрайман. Агар Панжшерга гуманитар ёрдам етиб бормаса, фалокат юз беради», — деган Дўстум.

Дўстум «қора рўйхатдаги террорчилар»дан Панжшердаги этник тозалов ва қатлиомни тўхтатиш, водий дарвозаларини очиш ва оммавий ахборот воситаларига вазиятни ёритиш учун имкон беришни талаб қилган.