Байден бензин нархи нега пастламаётганини текширишни буюрди

АҚШ президенти Жо Байден мамлакатда бензин нархи баландлигича қолаётганининг сабабини ўрганишни буюрган. Бу ҳақда WSJ'га асосланиб Forbes ёзмоқда.

Манбада айтилишича, Байден АҚШ Федерал савдо комиссиясига бензин нархининг баландлигича қолаётганида нефть компанияларнинг қанчалик роли борлигини текширишни буюрган. АҚШ президентининг фикрича, бензин нархининг тушмаётганига нефть компанияларининг истеъмолчилар ҳуқуқларига зид ҳаракат қилаётгани сабаб бўлиши мумкин ва бу борада шубҳали маълумотлар тобора кўпайиб бормоқда.

Financial Times нашрининг ёзишича, рейтинги борган сари тушиб бораётган Байденни фуқаролар бензин нархининг кўтарилиб кетишида ҳам айблаган ва президент айнан шу сабаб ҳаракатга тушиб қолган. АҚШнинг энг йирик нефтогаз компанияси Exxon бу гапларга муносабат билдирмаган. Яна бир гигант Chevron эса АҚШ нефть институти сўровига жавоб берар экан Байден шунчаки юқори даражадаги ўзгаришлардан одамларни чалғитиш учун шундай баҳона топганини билдирган.

АҚШ нефть институти American Petroleum Institute вице-президенти Фрэкн Маккиарола ҳам Байденнинг бу фикрига муносабат билдирган: «Шундоғам кунлик назоратда бўлиб турган бозорни текширишни буюриш ёки ОПЕКдан нефть ишлаб чиқаришни оширишни сўрашдан кўра нефть ва газни сифатли қайта ишлашни ривожлантириш ҳақида ўйлаганимиз тузук, менимча», деган мутахассис.

АҚШда айни дамда бир литр бензин нархи 99 центгача кўтарилган. Бу 2014 йилдан кейинги энг баланд нарх ҳисобланади. Таққослаш учун ўтган йил АҚШда бензин ўртача 1 литри учун 55 центдан сотилган.

Нефтни қайта ишловчилар бензин нархининг ошишига Жо Байден томонидан Keysote XL нефть ўтказгичи қурилишининг тўхтатиб қўйилганини келтиришмоқда. Канададан АҚШга нефть олиб келишга мослашган бу йирик лойиҳа яна бир демократ президент Барака Обама даврида тўхтатиб қўйилган эди. Кейинчалик Дональд Трамп қурилиш тикланганини эълон қилган ва баъзи ишлар тикланганди ҳам. Аммо Жо Байден сайловолди дастурида экология борасида берган ваъдасини бажариш асносида Keystone XL лойиҳасини тўхтатиб қўйди. Эндиликда Канада ва АҚШ судлашиши эҳтимоли ҳам йўқ эмас.