3та техник хизмат кўрсатиш маркази ходимлари кешбэкка эга бўлиш мақсадида ўзгаларнинг 11 млрд сўмлик чекларини рўйхатдан ўтказган, ДСҚ чекларни бекор қилди.
2022 йил 1 январдан бошлаб чек тақдим қилганлик учун харидорларга харид суммасининг бир фоиз миқдорида кешбэк бериш амалиёти йўлга қўйилганди. ДСҚ 15 900та чек учун кешбэк бекор бўлганини маълум қилди.
“Бугунги кунга қадар кешбэк учун рўйхатдан ўтказилган чеклар таҳлил қилинганда, айрим техник хизмат кўрсатиш маркази (ТХКМ) ходимлари кешбэкка эга бўлиш мақсадида вазифаларини суиистеъмол қилиб, ўзгалар томонидан амалга оширилган харид учун шаклланган чекларни ўз номидан рўйхатдан ўтказиш ҳолатлари аниқланди.
Жумладан, 3 нафар ТХКМ ходими томонидан ўзлари хизмат кўрсатаётган 281та тадбиркорлик субъектининг 11 млрд сўмлик 15,9 мингта харид чеки рўйхатдан ўтказилган”, — дейилади расмий хабарда.
Солиқ қўмитаси техник хизмат кўрсатиш ходимлари қанча миқдорда кешбэкни рўйхатдан ўтказгани ҳақида маълумот берган:
Қ.Н. томонидан 178 нафар тадбиркорнинг 7 524та 5,8 млрд сўмлик;
Қ.А. томонидан 80 нафар тадбиркорнинг 5 206та 4,6 млрд сўмлик;
Р.Ф. томонидан 23 нафар тадбиркорнинг 3 131та 0,6 млрд сўмлик чеклари “Солиқ” мобил иловасида QR-код орқали рўйхатдан ўтказилган.
“Солиқ” мобил иловасида юқоридаги шахслар томонидан харидни амалга оширмасдан рўйхатга олинган чеклар учун ҳисобланган кешбэк суммаси бекор қилинган.
Бир ойда қанча кешбэк рўйхатдан ўтказилган?
Маълумотларга кўра, жорий йил 1 январдан 1 февралга қадар 32 755 242та (ўтган йилнинг мос даврига нисбатан, 17 134 987та кўп, яъни 191 фоизга ошган) харид чеки онлайн назорат-касса техникалари орқали чоп этилган бўлиб, шундан 1 482 563тасига “Солиқ” мобил иловаси орқали 19,4 млрд сўмлик кешбэк ҳисобланган.
Эслатиб ўтамиз, харид миқдоридан бир фоиз кешбэк чакана савдо, умумий овқатланиш ва аҳолига маиший хизмат кўрсатиш объектларидаги харид учун берилган онлайн назорат-касса техникаси QR-кодли чекини “Солиқ” мобил иловасида рўйхатдан ўтказган жисмоний шахслар учун тўланади.
Аввалроқ, 2022 йил 14 январ ҳолатига кўра, ўзбекистонликлар харид чекини рўйхатдан ўтказиш орқали 5 млрд сўмлик кешбэк йиғгани маълум қилинганди.
