Украинанинг эгаллаб олинган ҳудудларининг Россия Федерацияси таркибига кириши бўйича «референдумлар» якунланди, деб хабар бермоқда Россия ахборот агентликлари.
Россия ҳудудларида бўлиб ўтган "Донецк ва Луҳанск халқ республикалари"нинг Россия Федерацияси таркибига қўшилиши масаласи бўйича овоз бериш якунланди.
Иштирокчиларнинг 98,69 фоизи "ЛХР"нинг Россияга қўшилиш тарафдори бўлди, "ДХР"нинг Россияга қўшилиш масаласида овоз берганларнинг 97,93 фоизи ижобий фикр билдиргани айтилади.
Россия ҳудудларида 441 минг киши "ДХР"нинг қўшилиши учун, 394 минг киши эса "ЛХР"нинг қўшилиши учун овоз берди.
Ўзини «ДХР» ва «ЛХР» деб эълон қилган ҳудудларда маҳаллий аҳоли «республиканинг Россия Федерациясининг субъекти ҳуқуқи асосида Россия таркибига киришини» қўллаб-қувватлаяптими, деган савол «овозга» қўйилди.
Ишғол қилинган Запорижжя ва Херсон областларида сайлов бюллетенларига «Украинадан ажралиб чиқиш, мустақил давлат ташкил этиш ва Россия Федерацияси таркибига Россия Федерацияси субъекти ҳуқуқи асосида кириш тарафдоримисиз?» деган савол қўйилди.
АҚШ, Европа иттифоқи ва НАТО «овоз бериш» Россиянинг Украина суверенитети ва ҳудудий яхлитлиги тамойилларига тажовуз қилиши ва халқаро ҳамжамият томонидан тан олинмаслигини бир неча бор таъкидлади.
Россия томонидан босиб олинган Украина ҳудудларида ўтказилган «референдумлар» қонунийликка эга эмас ва халқаро ҳуқуқни қўпол равишда бузиш ҳисобланади, деди НАТО бош котиби Йенс Столтенберг Украина президенти Володимир Зеленский билан телефон орқали суҳбатдан кейин.
Шимолий Атлантика альянси бош котиби «бу ҳудудлар Украинага тегишли», деб таъкидлади. НАТО давлатлари Украина суверенитети ва ўзини ҳимоя қилиш ҳуқуқини қатъий қўллаб-қувватламоқда, дея қўшимча қилди Столтенберг.
Бундан олдин Путин 30 сентябр куни Украинадаги янги аннексия ҳақида эълон қилиши мумкин экани хабар қилинганди.
Буюк Британия Мудофаа вазирлиги фикрича, Россия президенти Владимир Путин 30 сентябр куни Украинанинг эгаллаб олинган ҳудудлари Россия таркибига қўшилганини расман эълон қилиши мумкин.
Буюк Британия Мудофаа вазирлигининг 27 сентябрь, сешанба кунги кунлик ҳисоботига кўра, Путиннинг Федерал мажлис иккала палатасига мурожаати ўша кунга режалаштирилган ва Россия президентида бундан аннексияни расман эълон қилиш учун фойдаланишга «ҳақиқий имконият» мавжуд.
