Киевга танклар етказиб бериш ҳам дастлаб мунозарали масала эди, деди Европа дипломатияси раҳбари Киевда бўлиб ўтадиган Европа Иттифоқи ва Украина саммити арафасида.
Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел бир қатор Ғарб давлатлари, жумладан, Германия ва АҚШнинг ҳозирги позициясига қарамай, Украинага қирувчи самолётлар етказиб бериш ҳали ҳам амалга оширилиши мумкинлигини истисно этмади. Дипломатнинг 1 февраль, чоршанба куни Киевда 3 февралга режалаштирилган Европа Иттифоқи-Украина саммити арафасида айтганидек, жанговар танклар етказиб бериш ҳам аввалига мунозарали масала бўлган, бироқ якунда консенсусга эришилди.
Шу билан бирга, Боррел Россия ва Украина ўртасидаги можаронинг кучайиши эҳтимолидан қўрқиш ўтмишда Киевга Ғарб қуролларини етказиб беришнинг ҳар бир янги босқичидан олдин билдирилганини эслатди. Унинг ўзи қирувчи самолётларни етказиб беришни маъқуллайдими, деган саволга дипломат жавоб бермади. «Менинг вазифам - консенсусга эришиш», - дея Боррелнинг сўзларини келтирган dpa. Шу билан бирга, у бундай вазиятда аралашмаслик учун очиқчасига у ёки бу позицияни эгалламаслик кераклигини тушунтирди.
Бир қатор европалик сиёсатчилар, биринчи навбатда, Полша бош вазири Матеуш Моравецкий Украинани Ғарб жанговар самолётлари билан таъминлаш тарафдори эканини очиқчасига айтди. Германия канцлери Олаф Шольц ва АҚШ президенти Жо Байден эҳтиёткорроқ позицияни эгаллаб, бундай таъминот ғоясини қўллаб-қувватламади.
Германияда, биринчи навбатда, Сўл партия сиёсатчилари Украинага танклар ва потенциал жанговар самолётлар етказиб беришнинг салбий оқибатлари ҳақида огоҳлантирмоқда. Бундестаг депутати Сара Вагенкнехт 25 январь куни Phoenixтелеканалига берган интервьюсида: «Мен буни ўта хавфли деб ҳисоблайман ва бундай қарорлар урушнинг янада кучайишига олиб келишидан қўрқаман», деди.
Айни пайтда, 1 февраль куни Германиянинг RTL ва ntv телеканаллари Forsa социологик институти топшириғи билан ўтказилган сўров натижаларини эълон қилди. Унга кўра, немисларнинг 72 фоизи Россия бошлаган уруш Украина ҳудудидан ташқарига ҳам тарқалиши мумкинлигидан хавотирда.
Аксарият респондентлар уруш туфайли Германиядаги иқтисодий аҳвол (62 фоиз) ёки ўз оилаларининг молиявий аҳволи (40 фоиз) ёмонлашишидан қўрқишади. Сўров иштирокчиларининг 34 фоизи Германия ҳам Россия томонидан босиб олиниши мумкинлигидан хавотирда.
