Ниҳоят, миллий жамоалар билан боғлиқ йиғинлар ушбу мавсум учун якунланди ва клублар футболи ўзининг энг қизғин палласига кириб бормоқда. Испания ва Италияда чемпион номи деярли савол қолдирмаётган бўлса-да, Англия ва Германияда вазият жуда қалтис ва албатта, чемпионлик масалаларидан ташқари, клублар еврокубоклар учун йўлланмалар, лигада жон сақлаш каби вазифалар бизни кутиб турган икки ойлик марафонда ҳал қилиб олишлари керак. Марафонга эса энг зўри, Пеп Гвардиола ва Юрген Клоппнинг навбатдаги дуэли билан старт берилади.
АПЛ. 1 апрель (шанба)
МАНЧЕСТЕР СИТИ – ЛИВЕРПУЛЬ
Ўйин бошланиш вақти: 16:30
АПЛ биратўла турнинг марказий учрашуви билан бошланади. Ҳам чемпионлик пойгасида, ҳам Чемпионлар лигаси йўлланмаси учун курашда ҳал қилувчи баҳслардан бири.
Пеп Гвардиола жамоаси шундай паллага етиб келдики, энди хатолар кечирилмайди. «Сити» ўзи учун таниш бўлган режимга қайтишга мажбур – бошқа очко йўқотилмаслиги керак. «Арсенал» аввалгидан ҳам кучлироқ бўлиши табиий, зеро «финиш»ни кўрганда лондонликлар ўз даражасидан ҳам юқорироқ ҳаракат қилиши турган гап. Бунинг устига «Арсенал» еврокубоклардан чиқиб кетди, «Манчестер Сити» эса чемпионатдан ташқари, Чемпионлар лигаси ва Англия кубоги учун ҳам курашиши керак.
«Ливерпуль» қатъият синови учун мукаммал номзод. Клопп шогирдлари бу ҳафта «Манчестер Сити», келаси дам олиш кунлари эса «Арсенал» билан ўйнайди. Жамоа чемпионлик дуэлида муҳим роллардан бирини ўйнаш билан биргаликда, ўз мақсадига ҳам етиши керак. «Ливерпуль» йўқотилган очколар бўйича «Ньюкасл»дан 5, «МЮ»дан 8 очко ортда бормоқда. Бу турда шу рақиблар ўзаро ўйнашидан фойдаланиб, ливерпулликларда яқинлашиб олиш имконияти бор. Якунда ҳеч бўлмаса, икковидан бирини қувиб ўтиш учун жамоа ўта юқори савиядаги ўйинни намойиш қилиши шарт. «Сити» ва «Арсенал»га қарши ўйинлар орасида, сешанба куни «Ливерпуль» «Челси» меҳмони бўлишини ҳам унутмаслик керак. Ҳал қилувчи палла.
Таркибларга келсак, «Ливерпуль» жароҳатлар муаммоси билан курашишда давом этяпти. Алькантара ҳали қайтгани йўқ, Байжетич мавсум охиригача сафдан чиққан. Булар етмагандек, Нуньез, Ҳендерсон, Цимикас, Диас каби футболчиларнинг майдонга тушиши сўроқ остида турибди. Майли, Клопп бундай муаммоларга ўрганиб ҳам қолди, доим кимнидир ўрнини тўлдириш муаммоси билан курашиб келмоқда, аммо «шаҳарликлар»нинг муаммоси сон жиҳатдан камроқ бўлса-да, таъсир доираси каттароқ бўлиши мумкин. Эрлинг Ҳоланд сўнгги машғулотларни ўтказиб юборди ва унинг «Ливерпуль»га қарши ўйинда майдонга туша олмаслиги мумкинлиги ҳақидаги хабарлар пайдо бўлди. «Манчестер Сити» урган голларининг 40 фоизидан ортиғининг муаллифи бўлган ҳужумчининг ўрнини тўлдириш осон бўлмайди, албатта. Шунингдек, Фил Фоден ҳам жарохати туфайли шерикларига ёрдам бера олмайди.
Ўзаро ўйинларда «Ливерпуль» сўнгги йилларда устунликка эга, аммо айнан «Этиҳад»даги учрашувларга эътибор қаратсак, 2015 йил, яъни Клоппнинг энг биринчи ташрифидаги (4:1) ғалабадан буён «Ливерпуль» бу стадионда ютгани йўқ. Тўғри, кубок ва ЕЧЛ ўйинларида меҳмонларнинг ғалабасига гувоҳ бўлганмиз, аммо айнан АПЛ доирасидаги баҳсларда манчестерликларнинг устунлиги яққол кузатилади.
Бундеслига. 1 апрель (шанба)
БАВАРИЯ – БОРУССИЯ ДОРТМУНД
Ўйин бошланиш вақти:21:30
Бир қатор жамоалар навбати билан «Бавария»га чемпионлик пойгасида қаршилик қилиб туришса-да, апрель ойига келиб мана шундай интригали вазият анчадан бери кузатилмаганди. Дортмундликлар Мюнхенга бир очколик фарқ билан турнир пешқадами сифатида ташриф буюрадилар ва агар камида фарқ сақланиб қолса, «Боруссия»нинг амбицияси янада жиддийлашиши табиий. Биринчидан, жамоа кейинги 8 учрашувнинг 5 тасини ўз майдонида ўтказади, сафар ўйинлари ҳам турнир жадвалининг иккинчи ярмидаги жамоалардан (Бохум, Штутгарт, Аустбург) иборат. Иккинчидан, «Бавария»дан фарқли равишда, дортмундликлар Чемпионлар лигасида иштирок этишмаяпти. Яъни, Терзич мана шу ўйиндан омонликда ўтиб олса, кейинги барча учрашувларни ўз фойдасига ҳал қилиш имкониятига эга. Бу ўйин эса чемпионлик масаласига таъсир қилувчи эмас, бемалол, бу масалани ҳал қилувчи баҳс сифатида таърифланиши мумкин.
Яна бир эътиборга молик воқеа – бу сафар мюнхенликлар майдонга Томас Тухел қўл остида тушишади. Ўз вақтида, мазкур азалий баҳсларда «Боруссия»ни бошқарган мураббий «Бавария»даги дебютини собиқ жамоасига қарши амалга оширади. Клуб «ПСЖ» устидан қозонилган икки ғалабадан сўнг ҳам Нагелсманни бўшатиб юбордими, демак Бундеслигадаги вазият ҳам уларни жиддий ўйлашга мажбур қилмоқда. Бундан ташқари, Тухел бошқа клубга, масалан «Тоттенҳэм»га ўтиб кетмаслиги учун ҳам «Бавария» босслари шошилинч таклиф билан чиқишгани айтилмоқда. Бу ҳам айнан мана шу учрашувда мураббий фактори катта аҳамият касб этишини билдиради.
Таркиблар борасида мезбонлар сафида Жамол Мусиаланинг йўқлиги энг катта йўқотиш сифатида баҳоланиши мумкин. Ёш футболчи сўнгги ўйинларда жамоа етакчисига айланиб қолаётганди. Меҳмонлар таркибида эса Карим Адейеми ҳали қайтгани йўқ, Юлиан Брандт ҳам апрелнинг ўрталарига сафга қайтиши керак. Шундай бўлса-да, шу куни майдонга тушадиганларга кўпроқ эътибор қаратган маъқулроқ, зеро Киммих – Беллинҳэм қарама-қаршилиги нафақат Бундеслига, балки Европа миқёсда ҳам катта тўқнашув сифатида тилга олинишга лойиқ.
Ўзаро ўйинларда «Бавария» табиийки, устун, ҳатто агар фақат Мюнхендаги учрашувларга эътибор қаратсак, умуман, Бундеслигада мезбонлар қаторасига 10 ўйиндан бери фақат ғалаба қозониб келмоқдалар. Бу ғалабалар ичида бештаси йирик ҳисобда бўлгани, ҳатто бир маротаба 6:0 ҳисоби қайд этилгани ҳам «Бавария»га қўшимча ишонч бериши турган гап. Дортмундликларнинг бу стадиондаги сўнгги ғалабаси 2014 йилда рўй бергани ва ўшанда томонларни Гвардиола ва Юрген Клопп бошқарганини айтсак, эҳ-ҳе... Бу серияни бузилиш вақти келибди, қизиғи, худди шу куни Гвардиола ва Клопп Англияда ўзаро тўқнаш келиб турган пайт бўлса...
АПЛ. 2 апрель (якшанба)
НЬЮКАСЛ – МАНЧЕСТЕР ЮНАЙТЕД
Ўйин бошланиш вақти: 20:30
Юқори ўринлар учун даъвогар бўлган икки жамоанинг тўқнашуви айниқса, Чемпионлар лигаси йўлланмаси учун курашда катта аҳамият касб этади. «Манчестер Юнайтед» АПЛ доирасидаги сўнгги икки ўйинда ғалаба қозона олмай, ўртадаги фарқни қисқартириб қўйгани ҳам ўйинга қўшимча интрига юклайди – мезбонлар агар ғалаба қозонадиган бўлса, очколар бўйича «МЮ»га етиб олиб, тўплар нисбати бўйича қувиб ҳам ўтадилар. Яхши имконият.
Бу икки жамоа яқинда Англия Лига кубоги финалида ҳам тўқнаш келгандилар. Ўшанда «қизиллар» 2:0 ҳисобида ғалаба қозонган бўлишса-да, ўйин борасида, айниқса, 2-таймда «Ньюкасл» рақибидан кам кўринмаганини айтиш лозим. Бунинг устига бу сафарги ўйин «Ньюкасл» майдонида бўлиб ўтади, финалда илк голни уриб, ўйинда бурилиш ясаган Каземиро эса дисквалификация туфайли шерикларига ёрдам бера олмайди.
Таркиблар борасида йўқотиш фақат Каземиро эмас, ҳар икки жамоа ҳам ушбу ўйинда қатнашиш бўйича катта ё кичик муаммоси бор исмларга тўла. Каземиродан ташқари, Гарначо, Варан ва Марсиял тайёр эмас. Маркус Рэшфорд жароҳати туфайли миллий жамоа йиғинларини ўтказиб юборди. Ҳужумчи машғулотларга қайтгани айтилаётган бўлса-да, ўйинга қай даражада тайёр бўлиши шубҳа остида. Шунингдек, Марсель Забицер Австрия миллий жамоаси йиғинида кичик жароҳат олди ва иккинчи ўйинда майдонга туша олмади. Эдди Ҳауга ҳам хавас қилиб бўлмайди. Аллан Сен-Максимен ва Энтони Гордонлар йиғинлар олдидан жароҳат олишганди ва ушбу учрашувда асосий таркибда бўлишлари шубҳа остида қолмоқда. Дарвозабон Ник Поуп ҳақида ҳам шундай хабарлар бор. Жамоа етакчиларидан бири Мигел Алмирон апрел ойининг охирида сафга қайтиши мумкин холос. Асосий ҳимоячилардан бири Свен Ботман вирус юқтириб олгани ҳақида маълумотлар тарқалган.
Жамоаларнинг биринчи даврадаги «Олд Траффорд»даги тўқнашувида ҳисоб очилмаганди. Ўтган мавсумда «Сент Жеймс Парк»да бўлиб ўтган баҳсда ҳам томонлар дурангга рози бўлишганди – 1:1. Умуман барча мусобақалар бўйича «Ньюкасл»нинг «МЮ» устидан ғалаба қозона олмаётган ўйинлари серияси 7тага етди.
А Серия. 2 апрель (якшанба)
НАПОЛИ – МИЛАН
Ўйин бошланиш вақти: 23:55
«Наполи»нинг чемпион бўлишига ҳеч ким шубҳа қилмай қўйган бўлса керак, зеро ҳозирда жамоа энг яқин таъқибчиси «Лацио»дан 19 очкога илгарилаб кетган. Атиги бир неча турдан сўнг, катта эҳтимол билан кучли бешликда биринчи бўлиб «Наполи» расман чемпионликни нишонлайди, унгача эса бир қатор жиддий синовлар бор.
Масалан, «Милан»га қарши ўйин. Ҳа, бу ўйиндаги йўқотиш ҳеч нарсани ҳал қилмаслиги мумкин, аммо худди шу рақиблар ўн кун ўтиб Чемпионлар лигаси чоракфиналида ҳам тўқнаш келишлари масалани бошқа ўлчамга олиб чиқади. А Серия ўйинидаги ғалаба ЕЧЛ баҳслари олдида қўшимча ишонч бериши турган гап. Биринчи даврада Миланда бўлиб ўтган ўйинда «Наполи» 2:1 ҳисобида ғалаба қозонган бўлса-да, ўшанда «Милан» катта устунлик билан ўйнаган ва кўп жиҳатдан «Наполи»дан яхшироқ кўринганди. Ҳозир аҳвол бироз бошқача.
«Милан» учун эса бу ўйин очко жиҳатидан жуда зарур. Мамлакат чемпионлари бу мавсумда кучли тўртлик учун курашишмоқда ва бу ўйиндаги мағлубият биротўла икки жамоанинг ортдан қувиб ўтишига сабаб бўлиши, миланликларни 6-ўринга тушириб юбориши мумкин. Мавсум охирлаб бораётган бўлса-да, «Милан» кейинги учрашувларда барча асосий рақиблари – «Лацио», «Рома» ва «Ювентус» билан ўзаро куч синашади. Яъни, «Милан» учун мавсум энг қизғин ва шиддатли палласига кириб бормоқда.
Яна бир қизиқ жиҳат. «Милан»нинг сафарда ўйнаётганини инобатга олсак, имконият камдек кўринса-да, аслида, ўзаро ўйинларда бошқа тенденция кузатилмоқда. Бу жамоалар ўртасидаги сўнгги беш ўйинда фақат меҳмонлар ғалаба қозонаётгани қизиқ факт. Жумладан, Неаполда ўтган охирги 2 ўйинда «Милан» ғалаба қозонган, ундан олдинги учрашувда ҳам мағлубиятга учрамаган – 2:2.
1 апрель (шанба)
УНИОН БЕРЛИН – Штутгарт (18:30), АРСЕНАЛ – Лидс Юнайтед (19:00), ИНТЕР – Фиорентина (21:00), ЧЕЛСИ – Астон Вилла (21:30), ЮВЕНТУС – Верона (23:45), Эльче – БАРСЕЛОНА (23:55)
2 апрель (якшанба)
Монца – ЛАЦИО (18:00), РЕАЛ МАДРИД – Вальядолид (19:15), РОМА – Сампдория (21:00), ПСЖ – Лион (23:45), АТЛЕТИКО – Бетис (23:55)
3 апрель (душанба)
Эвертон – ТОТТЕНҲЭМ (23:55).
