IТ мутахассислари учун мўлжалланган танлов асосий ва махсус йўналишлардан иборат.
Президентнинг 2022 йил 23 августдаги 357-сонли қарорига асосан соврин жамғармаси 1 млн долларни ташкил этувчи President Tech Award энг яхши стартаплар танлови эълон қилинди. Мазкур танлов IТ соҳасидаги ёш стартаперларни қўллаб-қувватлаш мақсадида ташкил қилинган.
President Tech Award – рақамли технологиялар соҳасидаги энг яхши стартап лойиҳалари учун танлов.
Мусобақа асосий ва махсус йўналишлардан иборат. Асосий йўналиш тоифалари:
• сунъий интеллектга асосланган технологиялар;
• ижтимоий соҳадаги рақамли технологиялар;
• ахборот ва киберхавфсизлик соҳасидаги технологиялар;
• тадбиркорлик ва молиявий технологиялар;
• компьютер ва мобиль ўйинлар.
Танловнинг ҳар бир тоифаси учун соврин жамғармаси қуйидагича тақсимланади:
1-ўрин учун — $100 000;
2-ўрин учун — $50 000;
3-ўрин учун — $30 000.
Махсус йўналиш эса Хакатон Гран-приси бўлиб, бу 72 соат ичида рақамли ечим яратишни кўзда тутади. Хакатонда ғолиб бўлган жамоа $100 000 миқдоридаги пул мукофотига эга бўлади.
Иштирок этиш учун аризалар танловнинг шаффофлиги ва очиқлигини таъминлаш мақсадида awards.gov.uz махсус портали орқали қабул қилинади.
Портал – бу танлов ҳақидаги барча маълумотлар жойлаштирилган веб-сайт. Бу ерда сиз жамоаларга қўшилишингиз ва йўналишлардан бирида иштирок этишингиз мумкин. Кейинги босқичга ўтиш ёки ўтмаслик ҳақидаги маълумотлар ҳам махсус платформа орқали юборилади.
Ҳужжатлар 1 июлгача қабул қилинади.
1 июлдан 25 июлга қадар саралаш босқичи ўтказилади.
Танловда 30 ёшгача бўлган шахслар иштирок этиши мумкин. Асосий йўналишда – фақат Ўзбекистон фуқаролари, махсус йўналишда эса IТ-Park резидент компаниялари ходимлари бўлган чет эл фуқаролари ва фуқаролиги бўлмаган шахслар ҳам қатнаша олади.
President Tech Award танлови ташкилотчилари қизиқарли челленж ҳам эълон қилишди.
Унинг шартига кўра, сиз стартапингизга мос йўналишни аниқлаш учун танловнинг расмий веб-сайтида тестдан ўтасиз ва жавобингизни изоҳда қолдирасиз.
Бундан ташқари, awards.gov.uz сайти десктоп версиясидаги ўйинда иштирок этиб, совринларни қўлга киритишингиз мумкин.
Шунингдек, ташкилотчилар яна бир янгиликка қўл уриб, Magic City Park’да President Tech Award танлови учун фотозона ташкил этишди. Эндиликда сиз ушбу ҳудудда суратга тушишингиз ва уни IT Park Instagram саҳифасини белгилаган ҳолда тармоққа юклашингиз мумкин. Энг креатив сурат соҳиблари махсус совринни ютиб олиш имкониятига эга бўлади.
Сайт: awards.gov.uz
Telegram: t.me/PresidentTechAward
Мурожаат учун: t.me/uztechaward
Реклама
