Apple янги iPhone дастурий таъминотида қўнғироқни тугатиш тугмачасини кўчиришни режалаштирмоқда, деб хабар беради CNBC iOS 17 бета-версиясига таяниб. Унда компания қўнғироқлар экранининг пастки қисмидаги қизил тугмани марказдан пастки ўнг бурчакка кўчирди. Фойдаланувчилар ижтимоий тармоқларда тугмачанинг янги жойлашувига кўникишга тўғри келишидан шикоят қилмоқда.
Apple смартфонлари учун операцион тизимнинг янги версияси сўнгги йиллардаги энг катта ўзгаришлардан бирини ўз ичига олади. Бу узоқ вақт давомида iPhone фойдаланувчиларидан мушак хотирасини машқ қилишни талаб қилади: iOS 17 бета-версияларида Apple «Қўнғироқни тугатиш» тугмачасини экраннинг пастки қисмидаги марказдан пастки ўнг бурчакка кўчирди, деб хабар бермоқда CNBC.
iOS 17’да қизил қўнғироқни тугатиш тугмаси вертикал тугмалар қаторининг пастки қисмида, FaceTime чақирув тугмачалари ва рақам теришга ўтиш учун кейинги тугмалар қаторининг орқасида жойлашган. Ижтимоий тармоқлардаги фойдаланувчилар бундай янгиликка муносабат билдирди — улар тугмачанинг янги жойлашувига кўникиш учун вақт керак бўлиши мумкинлигини ёзган. Аксарият фойдаланувчилар ҳали iOS 17’га эга эмас. У фақат бета-версияда мавжуд ва Apple’га хатоларни топишда ёрдам беришга тайёр одамлар учун мўлжалланган.
Сентябрь ойида янги iPhone моделлари эълон қилинганидан кейин iOS 17 кузда барча iPhone фойдаланувчилари учун тақдим этилади. Янгиланган дастурий таъминот реал вақт режимида овозли почта транскрипциясини, фойдаланувчиларга териш пайтида кўрсатиладиган бошқа шахснинг суратини танлаш имконини берувчи «контакт карталари»ни ва қалинроқ шрифтлар билан фойдаланувчи интерфейсини ўз ичига олади.
Apple таниш интерфейсни биринчи марта ўзгартираётгани йўқ, у аввал ҳам тугмачаларни телефоннинг пастки қисмига яқинроқ жойлаштирган. Бу смартфон экранларининг ортиб бораётган ҳажмига нисбатан уни янада эргономик қилади.
2021 йилда Apple iOS 15 бета-версиясида Safari браузерини ўзгартириб, URL сатрини пастки қисмга қўйиб, дизайнини янгилади. Аммо сўнгги версия сентябр ойида чиқарилган вақтга келиб, Apple баъзи ўзгаришларни бекор қилди ва фойдаланувчиларга URL сатрини саҳифанинг юқори қисмига қайтариш имконини берди. Apple вакили қўнғироқлар экрани ўзгарадими ва уни мослаштириш мумкинми, деган саволга жавоб бермади. 8 август, сешанба куни компания акциялари 0,53 фоизга ошиб, ҳар бир акция учун 179,8 долларни ташкил қилди.
