Иордания қироли: Фаластин ҳуқуқлари амалга ошмай туриб, тинчликка эришиш мумкин эмас

Фаластин масаласи икки давлат тамойили асосида ҳал қилиниши керак, дейди Абдуллоҳ II.

Фото: Hannibal Hanschke - Pool/Getty Images

Яқин Шарқда тинчлик ва барқарорликни ўрнатиш Фаластин масаласини икки давлат тамойили асосида адолатли ҳал қилмасдан туриб, амалга оширилиши мумкин эмас. Бу ҳақда Иордания қироли Абдуллоҳ II маълум қилди.

«Ҳозирда Фаластин ҳудудларида содир бўлаётган хавфли зўравонлик ва ҳужумлар минтақамиздаги хавфсизлик ва барқарорликка фақат икки давлатга асосланган кенг қамровли ва адолатли тинчлик орқали эришиш мумкинлигини исботлайди», деди қирол мамлакат миллий ассамблеяси (парламент)даги нутқида.

У Иордания Фаластинни қўллаб-қувватлашда давом этишига ишонтирди.

«Биз биродар Фаластин халқининг адолатли ишини ва манфаатларини ҳимоя қилишдан воз кечмаймиз. Иордания Қуддусдаги мусулмонлар ва насронийларнинг муқаддас жойларини ҳимоя қилиш бўйича ўз позициясидан ортга чекинмайди», — деди Иордания қироли.

#Фаластин #Иордания

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.