Шолц ва Стармер Германия ва Британия муносабатлари бўйича келишув тайёрламоқда

Германия ва Буюк Британия икки томонлама муносабатлар бўйича шартнома тузади. Германия канцлери Олаф Шолц 28 август, чоршанба куни Берлинда Британиянинг янги бош вазири Кир Стармерни биринчи марта қабул қилар экан: «Биз шунчаки баёнот беришни эмас, балки муносабатларимизни мутлақо янги асосда қурмоқчимиз», деди. 

Шолц: «Кўп йиллик ва ишончли ҳамкорлик» 

Шолцнинг сўзларига кўра, Германия ва Британия ўртасида «умумий қадриятлар ва ишончли дўстлик билан ажралиб турадиган узоқ муддатли ва ишончли ҳамкорлик» мавжуд. «Биз халқларимиз фаровонлиги, Европа фаровонлиги ва трансатлантик макон хавфсизлиги йўлидаги ушбу ҳамкорликни қадрлаймиз ва қўллаб-қувватлаймиз», деб таъкидлади Германия ҳукумати раҳбари. Янги шартнома Германия ва Британиянинг «Европадаги яқин шериклар» мақомини акс эттиради, дея қўшимча қилди у. 

Шунингдек, канцлер британиялик ҳамкасбининг «Европа Иттифоқи билан муносабатларда янги саҳифа очиш» истагини ҳам олқишлади. Британия ҳар доим «бутун Европага тааллуқли муҳим масалаларни ҳал қилишда» ажралмас шерик бўлиб келган, деди у. 

Стармер: «Шартноманинг юраги» - мудофаа шартномаси

Ўз навбатида, Стармер ўзи ва Шолц «Британия-Германия муносабатларида янги саҳифа очаётганини» айтди ҳамда «ноёб имконият» ҳақида эълон қилди. Унинг сўзларига кўра, «шартноманинг юраги» янги мудофаа шартномаси бўлади. «Аммо биз ноқонуний миграцияга қарши кураш ва иқлимни муҳофаза қилиш каби масалаларда ҳамкорликни чуқурлаштирамиз», деди бош вазир. 

Бундан ташқари, келишув «тинчлик ва хавфсизлик учун ташқи сиёсатдаги ҳамкорлик», иқтисодий ўсиш ва саноат трансформациясини акс эттиради. Битимнинг бошқа мавзулари орасида миграция сиёсати, ҳуқуқ-тартибот органлари ҳамкорлиги, таълим, энергия хавфсизлиги, транспорт, атроф-муҳит сиёсати, технология, тадқиқот ва инновациялар мавжуд. 

Эълон қилинган қўшма баёнотда ҳозирда икки томонлама шартнома устида иш олиб борилаётгани ва у 2025 йил бошида имзоланиши кераклиги қайд этилган. Уни тайёрлаш жараёнида ҳукумат билан маслаҳатлашувлар ўтказилади. Ушбу келишув Лондон ва Берлин ўртасидаги муносабатларни «янги босқичга» олиб чиқади ва «икки давлат дуч келаётган муаммоларга» жавоб бўлади. 

Украинани биргаликда қўллаб-қувватлаш

Қўшма баёнотда, шунингдек, Украинани Россиядан ҳимоя қилиш учун биргаликда қўллаб-қувватлаш ҳам қайд этилган. «Биз Россия тажовузкорлигини тўхтатиб туриш, Украинани қўллаб-қувватлаш ва Европа мудофаасини мустаҳкамлашда давом этамиз», — деди Шолц ва Стармер. 

Куннинг бошида Стармерни Германия федерал президенти Франк-Валтер Штайнмайер қабул қилди. 

Лейбористлар партияси етакчиси Кир Стармер июл ойи бошидан буён Британия ҳукуматини консерватор Риши Сунак эрта парламент сайловларида мағлубиятга учрагач, истеъфога чиққанидан кейин бошқариб келмоқда. Стармер Британиянинг Европа Иттифоқига қайтишини инкор этади.