Трамп Путинга сабр-тоқати тугаётгани ҳақида сигналлар юбормоқда – ОАВ

АҚШ президенти Доналд Трамп Россия президенти Владимир Путиндан тобора кўпроқ ҳафсаласи пир бўлмоқда ва уни Украина президенти Володимир Зеленскийдан кўра Украинадаги тинчлик учун катта тўсиқ деб ҳисобламоқда. Бу ҳақда The Telegraph манбаларга таяниб ёзди.

Нашр суҳбатдошларига кўра, Россия байроғи остидаги нефт танкерининг қўлга олиниши ва санкциялар тўғрисидаги янги қонун лойиҳасининг қўллаб-қувватланиши Путинга урушни тўхтатиш вақти келгани ҳақидаги сигналлардир.

«У қамчи ва ширин кулча принципи бўйича ҳаракат қилади. Ўйлашимча, унда ширин кулча умуман қолмади», деди АҚШ президентининг яқин атрофидаги манба.

Яна бир манбанинг қўшимча қилишича, Трампни Россиянинг музокаралардаги «икки қадам олдинга - бир қадам орқага» тактикаси тобора кўпроқ ғазаблантирмоқда.

«Россияликларнинг «икки қадам олдинга - бир қадам орқага» тактикасини қўллаши маъмуриятни чарчатди: улар келишувларга тайёр кўринади, кейин эса биз кутган саволлар пайдо бўлганда ё вазиятни кескинлаштиради ёки умуман суҳбатни тўхтатади», деб тушунтирди АҚШ расмийларидан бири.

АҚШ амалдаги ва собиқ амалдорлари журналистларга Трамп маъмуриятининг позицияси Европа билан тобора яқинлашиб бораётганини айтди: Путин шунчаки вақтни чўзмоқда.

«Путиннинг доимий шафқатсизлиги, маккор хатти-ҳаракатлари ва манипуляциялари маъмурият эътиборидан четда қолмаяпти», деди у.

Аввалроқ, Трамп Путин ҳам, Зеленский ҳам ҳозир тинчлик битими тузишни хоҳлаётганини айтган эди. Унинг сўзларига кўра, музокаралар жараёни икки томоннинг позициялари туфайли бир неча бор боши берк кўчага кириб қолган. Шу билан бирга, Америка етакчисининг фикрича, иккала томон ҳам келишувларга эришишдан манфаатдор бўлиши мумкин. Шунга қарамай, у уруш тугаши мумкин бўлган ҳар қандай муддатни айтишдан бош тортди ва тинчликка эришиш учун муддатларни ошкора эълон қилиш одатидан воз кечди.