Қайси давлатлар мудофаа учун энг кўп маблағ ажратяпти?

Стокҳольм халқаро тинчлик муаммоларини ўрганиш институти (SIPRI) маълумотларига кўра, 2025 йилда АҚШ дунёдаги энг йирик ҳарбий бюджетга эга давлат бўлиб қолди.

Мамлакат ҳиссасига глобал ҳарбий харажатларнинг қарийб учдан бир қисми тўғри келган. Бу кўрсаткич АҚШнинг бутун дунё бўйлаб ҳарбий ҳозирлиги, замонавий қурол-яроғ дастурларини молиялаштириши ҳамда Европа, Осиё ва Яқин Шарқдаги иттифоқчилик мажбуриятлари билан изоҳланади.

Иккинчи ўринни Хитой эгаллади. Мамлакат мудофаа соҳасига тахминан 336 миллиард доллар йўналтирган. Сўнгги йигирма йил давомида Хитойнинг ҳарбий бюджети мунтазам ўсиб бормоқда.

Рейтингнинг юқори ўринларидан Россия, Германия, Буюк Британия, Украина, Франция, Италия, Польша ва Испания ҳам жой олган.

Осиё–Тинч океани минтақасида ҳам ҳарбий харажатлар сезиларли ошган. Ҳиндистон, Япония, Жанубий Корея, Австралия, Тайвань ва Сингапур сўнгги йилларда хавфсизлик соҳасидаги таҳдидлар ва минтақавий рақобат кучайиши фонида мудофаа бюджетларини кенгайтирган.

Жумладан, Ҳиндистоннинг ҳарбий бюджети 92 миллиард доллардан ошиб, мамлакатни дунёда бешинчи ўринга олиб чиққан. Япония эса мудофаа учун 62 миллиард доллардан ортиқ маблағ ажратиб, Иккинчи жаҳон урушидан кейинги энг йирик ҳарбий модернизация дастурини амалга оширишда давом этмоқда.

Мутахассислар фикрича, геосиёсий рақобатнинг кучайиши ва хавфсизликка оид таҳдидлар туфайли яқин йилларда ҳам дунё бўйлаб ҳарбий харажатлар ўсишда давом этиши мумкин.