Бу ҳақда 24 июл куни Полшанинг Polsat телеканали хабар берди.
Мазкур талаб партия раиси ўринбосари ва Полшанинг собиқ бош вазири Матеуш Моравецкий PiS доирасида «Ривожланиш Плюс» (Rozwój Plus) ассоциациясини ташкил этганидан кейин қўйилган.
Качинский партияни тарк этаётган сиёсатчиларнинг исмларини очиқламаган. Бироқ у партиядаги «обрўли ва жуда муҳим шахс» ташкилотни бўлиб юборишни режалаштирганини айтган.
30 дан ортиқ депутатнинг партиядан чиқиши бўйича якуний қарор 28 июл куни бўлиб ўтадиган партия кенгашида тасдиқланиши кутилмоқда.
PiS Сеймдаги энг йирик фракция мақомини йўқотиши мумкин
Ҳозирга қадар PiSнинг 178 нафар депутати бошқа сиёсий кучларнинг саккиз нафар вакили билан биргаликда Полша парламенти қуйи палатаси — Сеймдаги энг йирик фракцияни ташкил этиб келаётган эди.
30 дан ортиқ депутат партияни тарк этгач, PiS Сеймдаги иккинчи йирик фракцияга айланиши мумкин. Бундай ҳолатда бош вазир Доналд Тускнинг либерал «Фуқаролик коалицияси» етакчилигидаги фракция биринчи ўринга чиқади.
Качинскийнинг айтишича, партия аъзолари ҳужжатни имзолаш зарурлиги ва уни имзоламаслик қандай оқибатларга олиб келишини олдиндан билган.
Унинг таъкидлашича, можаро нафақат Моравецкий ташкил этган ассоциация билан, балки бир неча ҳафта олдин пайдо бўлган партияни бўлиб юбориш таклифи билан ҳам боғлиқ.
Качинский шу сабаб «Ривожланиш Плюс» ассоциациясини партияни бўлиш режасининг бир қисми сифатида қабул қилганини айтди. Унинг фикрича, ассоциация илгари сураётган ғояларни PiSнинг ўзи доирасида ҳам амалга ошириш мумкин эди.
Качинский ва Моравецкий ўртасидаги келишмовчилик
PiS ичидаги қарама-қаршилик 2026 йил март ойидан кучая бошлаган. Ўшанда Качинский 2027 йил кузида ўтказиладиган парламент сайловларида партиянинг бош вазирликка номзоди сифатида собиқ таълим ва фан вазири Пшемислав Чарнекни кўрсатган.
Чарнек партиянинг қаттиқ ўнг қаноти вакили сифатида танилган. Бу қарор орқали PiSни ўта ўнг қарашдаги сайловчилар учун янада жозибадор қилиш мақсад қилингани айтилмоқда.
2017–2023 йилларда Полша бош вазири бўлган Матеуш Моравецкий эса бошқа стратегияни қўллаб-қувватлаган. Унинг ташаббуси PiSʼни нафақат қаттиқ ўнг, балки ўнг марказчи сиёсий кучларни ҳам бирлаштирадиган кенг сиёсий лагерга айлантиришга қаратилган.
Апрел ойида Моравецкий партиянинг бир қатор вакиллари билан «Ривожланиш Плюс» ассоциациясини ташкил этди. Унинг мақсади PiS атрофида Полша ўнг ва ўнг марказ кучларини бирлаштириш бўлган.
Бироқ Качинский бу форматни қабул қилмаган. 15 июл куни ассоциация аъзоларидан 23 июлга қадар бошқа сиёсий бирлашмалар доирасидаги фаолиятдан воз кечишни назарда тутувчи ҳужжатни имзолаш талаб қилинган.
Моравецкий: Бизга сохта танлов таклиф қилинди
Моравецкий ҳужжатни имзоламаслик қарорини изоҳлар экан, партия раҳбарияти уларни икки йўлдан бирини танлашга мажбур қилганини айтди.
«Бизга сохта танлов қўйилди: ё қонуний ижтимоий ва сиёсий фаолиятимизни тўхтатишимиз, ёки кўп йиллар садоқат билан хизмат қилган партиямиздан чиқарилишимиз керак эди», — деди собиқ бош вазир.
Унинг таъкидлашича, ассоциация аъзолари PiSʼдан кетишни истамаган, аксинча, кенгроқ ўнг сиёсий кучларнинг сайловда ғалаба қозониши учун самаралироқ ишлашни мақсад қилган.
PiS рейтинги пасаймоқда
Партиядаги ички можаро PiS рейтинги 2025 йил кузидан буён пасайиб бораётган бир пайтга тўғри келди.
Бир йилга яқин вақт аввал PiS оммавийлик бўйича Доналд Тускнинг «Фуқаролик коалицияси»дан олдинда эди. Politico келтирган сўровларга кўра, ҳозир PiSʼни сайловчиларнинг 26 фоизи, «Фуқаролик коалицияси»ни эса 32 фоизи қўллаб-қувватламоқда.
Dpa агентлиги баҳосига кўра, 30 дан ортиқ депутатнинг партиядан кетиши PiS рейтингига қўшимча салбий таъсир кўрсатиши мумкин.
Бунда партия электоратининг бир қисми янада консерватив сиёсий кучларга — рейтинги 12,4 фоиз бўлган «Озодлик ва мустақиллик конфедерацияси» ёки 9,6 фоиз қўллаб-қувватлашга эга «Полша тожи конфедерацияси»га ўтиши мумкин.
Сайловчиларнинг нисбатан мўътадил қисми эса Моравецкий атрофида шаклланаётган сиёсий кучларни қўллаб-қувватлаши эҳтимол қилинмоқда.
