Қўшимча функционаллар
-
Тунги кўриниш
Трамп: НАТО Украина учун АҚШдан қурол сотиб олади
Доналд Трамп АҚШ, НАТО ва Украина ўртасида Киевни Америка қуроллари билан таъминлаш бўйича янги келишув имзоланганини эълон қилди. Республикачига кўра, Вашингтон алянсга қурол сотади, сўнгра улар Украина Қуролли кучларига тарқатилади.
Фото: REUTERS
Қўшма Штатлар НАТОга қурол сотади, кейин эса алянс Украинага уни етказиб беради. АҚШ президенти Доналд Трамп 10 июл, пайшанба куни Американинг NBC телеканалига берган интервюсида шундай деди.
Телеканал президент билан бўлган суҳбатнинг тўлиқ ёзувини эълон қилмаган, бироқ унинг бир қатор иқтибосларини тақдим этган. «Биз НАТОга қурол жўнатамиз ва НАТО бу қуроллар учун 100 фоиз тўлайди. Демак, биз юборган қуроллар НАТОга кетади, кейин эса НАТО Украинага ўша қуролларни етказиб беради, НАТО бу қуроллар учун тўлайди», — дейилади улардан бирида.
NBC хабарига кўра, Трамп буни АҚШ, НАТО ва Украина ўртасида Америка қуролларини етказиб бериш бўйича янги келишув деб атади. Бу ҳақда Шимолий Атлантика алянсининг июн ойида бўлиб ўтган саммитида келишувга эришилди, деди республикачи.
«Биз НАТОга қурол жўнатамиз ва НАТО бу қуролларнинг тўлиқ нархини қоплайди», деб такрорлади Трамп. «Биз Patriot тизимларини НАТОга юборишни режалаштирмоқдамиз, кейин эса НАТО уларни тарқатади».
«Россиядан ҳафсалам пир бўлди, аммо кейинги бир неча ҳафта ичида нима бўлишини кўрамиз», — дея қўшимча қилди республикачи NBC телеканалига берган интервюсида. У 14 июл, душанба куни «Россия бўйича асосий баёнот» билан чиқишга ваъда берди.
НАТО ёки алянс вакиллари Доналд Трампнинг янги келишув ҳақидаги сўзларига ҳозирча изоҳ бермади. НАТО бош котиби Марк Рютте 10 июл куни X ижтимоий тармоғида Трамп билан гаплашгани ва «раҳбарларни Украина кўпроқ ўқ-дорилар ва ҳаво ҳужумидан мудофаа тизимлари олишини таъминлаш учун олдинга боришга чақирганини» ёзди.
