АҚШнинг Кремлга қарши жорий қилган янги санкциялар пакетига Хитой ва Ҳонгконгда рўйхатдан ўтган 20 та компания ҳам киритилган.
«Хитой томони АҚШнинг ноқонуний бир томонлама санкцияларига қатъий қарши чиқади», деди 1 май, чоршанба куни Хитойнинг Вашингтондаги элчихонаси матбуот котиби Лю Пэнюй Хитой компанияларининг Кремлга қарши жорий қилинган янги санкциялар рўйхатига киритилишини изоҳлар экан. Бу корхоналар, АҚШ Молия вазирлиги баёнотига кўра, «Россияга қурол ишлаб чиқариш ёки ҳарбий дастурларни амалга ошириш учун асосий компонентларни олишда ёрдам беради».
Лю Пэнюйнинг сўзларига кўра, Хитой ҳукумати қонунлар ва меъёрларга мувофиқ икки мақсадли товарлар экспортини назорат қилади, Хитой ва Россия ўртасидаги савдо-иқтисодий ҳамкорлик эса Жаҳон савдо ташкилоти (ЖСТ) қоидалари ва бозор тамойилларига мос келади.
Вашингтон томонидан Украинадаги уруш учун Россия Федерациясига қарши жорий қилинган янги санкциялар пакетига Хитойда ва Хитойнинг Ҳонгконг маъмурий минтақасида рўйхатдан ўтган 20 та компания, шунингдек, бошқа беш давлат - БАА, Туркия, Озарбойжон, Белгия ва Словакия компаниялари киради. Бундан ташқари, 200 дан ортиқ Россия компаниялари санкциялар рўйхатида. АҚШ Давлат департаменти ҳам ишлаб чиқишда иштирок этган жазо чораларига визани тақиқлаш, молиявий активларни музлатиш ва санкцияланган компаниялар билан бизнес юритишни тўхтатиш киради.
Хитой Украинадаги урушда Россия учун муҳим компонентлар етказиб берувчи ҳисобланади
Хитой компанияларига қарши санкцияларни асослаб, АҚШ ғазначилиги улар Россия Федерациясига учувчисиз учоқлар ишлаб чиқариш учун зарур бўлган - пропеллерлар, двигателлар ва датчиклар, шунингдек порох ва ракета ёнилғиси учун зарур бўлган портловчи моддаларни яратишда товарлар экспорт қилганига аниқлик киритди. АҚШ молия вазири Жанет Йелленнинг айтишича, янги чекловлар Россиянинг ҳарбий ҳаракатларини янада заифлаштиради.
Аввалроқ Вашингтон Пекинни Ғарб санкцияларини четлаб ўтишда Россия мудофаа саноатини қўллаб-қувватлашга йўл қўйилмаслиги ҳақида бир неча бор огоҳлантирган. Хусусан, АҚШ давлат котиби Энтони Блинкен 26 апрел куни Пекинга ташрифи чоғида Хитой ташқи ишлар вазири Ван Ига ХХР Россияни Украинага қарши агрессив урушда қўллаб-қувватлаётганидан «жиддий хавотир» билдирди.
Хитой бу масалада бетараф эканини таъкидлаб келади ва Москва билан савдо ҳамкорлигини қонуний деб атайди. Пекин ғарбни «ҳар қандай учинчи томон» бу ҳамкорликни бузолмаслиги ҳақида огоҳлантирмоқда.
