Пекин Америка компанияларини, жумладан Boeing бўлинмаларини Тайванга қурол етказиб беришда айблади. Вашингтон Тайванга қурол етказиб берилишини исёнкор орол яқинида ХХР ҳарбий жиҳатдан кучайиши билан изоҳлади.
Хитой Тайваннинг янги президенти Лай Циндэ инаугурацияси фонида Америка яна учта мудофаа концернига қарши санкциялар жорий қилди. «Ишончсиз корхоналар» рўйхатига Boeing мудофаа ва космик бўлинмалари, шунингдек, General Atomics Aeronautical Systems ва General Dynamics Land Systems киради, деб маълум қилди 20 май, душанба куни Хитой Савдо вазирлиги.
Ҳисоботда айтилишича, бу АҚШ компаниялари Хитой исёнкор провинция ва ўзининг ажралмас қисми деб ҳисоблаган Тайванга қурол етказиб бермоқда. Бу компанияларга Хитойга янги сармоя киритиш, уларнинг раҳбарларига эса Хитойга кириш тақиқланган.
АҚШ-Хитой санкциялар уруши
Хитой яқинда Тайванга қурол етказиб берувчи Америка корхоналарига қарши бир қатор санкциялар жорий қилди. 2003 йил сентябр ойида Lockheed Martin ва Northrop Grumman’га қарши жазо чоралари қўлланган. Январ ойида яна бешта Америка фирмаси қора рўйхатга киритилди.
Вашингтон ва Пекин ўртасидаги муносабатлар узоқ вақтдан бери жуда таранг. АҚШ президенти Жо Байден Тайванга Америка қуроллари етказиб берилишини Пекиннинг бу исёнкор оролга босимининг кучайиши, хусусан, ХХР Тайван яқинида ҳаво ва денгиздаги ҳарбий мавжудлигини кучайтириши билан изоҳлади. Шунингдек, АҚШ Хитойга қарши янги санкциялар киритмоқда.
Хитой Тайванни ўзининг исёнкор вилояти деб билади ва унга бир неча бор ҳарбий ҳаракатлар бошлаш билан таҳдид қилган. Шу билан бирга, Тайван ўзини мустақил давлат деб ҳисоблайди ва Тайваннинг янги президенти Лай Циндэ ҳозирча бу позицияни шубҳа остига қўйиш ниятида эмаслигини очиқ айтди. Тайван мустақил давлат сифатида Палау, Тувалу ва Белиз каби ўнга яқин давлат томонидан тан олинган. Қўшма Штатлар Тайванни расман тан олмайди. Тайван БМТ аъзоси ҳам эмас.
