“Бойлар халққа қайтаради” – Ташиев 90-йилларда ноқонуний хусусийлаштирилган объектлар давлатга қайтарилишини айтди

Ташиев бойларнинг мол-мулклари қонунийлиги текширилишини таъкидлади.

“Аввалги нотинч даврларда улар халқ бойлигини, корхоналарни арзон пулга сотиб олган ёки коррупция орқали хусусийлаштиришган. Улар халқ мулкига эгалик қилиб, 30 йил давомида бойиб келган. Ҳаммасини тартибга солиш керак. Бу халқнинг бойлиги. Биз буни рўйхатга киритамиз. Бир неча киши эмас, балки бутун халқ бойиши керак.

Бир неча киши миллионлаб қирғизистонликларнинг бойлигига эга чиқди. Буларнинг барчасини давлатга қайтариш керак. Ҳечқиси йўқ, биз уларни қонун доирасида қайтарамиз”, — деди Қамчибек Ташиев.

У Жалолобод вилоятини мисол келтириб, ҳудуддаги учта йирик база давлатга қайтарилганини айтди. Қайтарилган базалардан бири собиқ депутат Қуваничбек Тумановлар оиласига тегишли бўлган.

“Уларнинг ўрнига биз мактаб ва Давлат ипотека компанияси учун уй қурамиз”, — деди Ташиев.

2023 йил май ойида Миллий хавфсизлик давлат қўмитаси раиси Қамчибек Ташиев Қирғизистонда коррупцияга қарши курашнинг иккинчи босқичи бошланганини эълон қилганди. Таъкидланишича, кураш уч босқичдан иборат. 

2024 йил аввалида Ташиев мамлакатда бандит, уюшган жиноий гуруҳлар, криминал авторитетлар бўлмаслигини қайд этганди.