Путин яна ҳарбий формада йиғилиш ўтказди. Лавров Европани «тинчлик йўлидаги асосий ғов» деб атади

Володимир Зеленский Доналд Трамп билан бўлиб ўтадиган учрашуви олдидан 27 декабр куни Канадага учиб борди ва европалик иттифоқчилар билан мулоқот ўтказди. Улар қаторида Канада, Франция, Финландия, Германия, Италия, Дания, Полша, Нидерландия, Норвегия ва Швеция раҳбарлари, шунингдек, Еврокомиссия бошлиғи Урсула фон дер Ляйен бор эди.

Зеленскийнинг ўзи журналистларга европалик иттифоқчилар билан суҳбат чоғида гап Трамп билан муҳокама қилиниши режалаштирилган «асосий ҳужжатлар» ҳақида борганини айтган. Унинг сўзларига кўра, 20 банддан иборат режанинг 90 фоизи аллақачон келишилган, улар бўйича «кимгадир ёқиши, кимгадир ёқмаслиги» мумкин бўлган ечимлар мавжуд. Украина президенти Трамп билан Донбасс тақдири, Запорижжя атом электр станцияси келажаги ва бошқа масалаларни муҳокама қилишни режалаштирмоқда.

Полша бош вазири Доналд Туск Украина учун хавфсизлик кафолатларини муҳокамаларнинг асосий банди деб атади. «Муҳокаманинг барча иштирокчилари Украина учун хавфсизлик кафолатлари ҳал қилувчи аҳамиятга эга деган фикрга келишди. Улар аниқ ва ишончли бўлиши керак. Бундай кафолатлар Полшанинг хавфсизлигини ҳам англатади», – деб ёзган Туск. Зеленскийнинг қўшимча қилишича, у Трамп билан суҳбат «яхши ўтиши»ни кутмоқда ва шундан кейин Европа етакчилари билан яна бир муҳокама ўтказилиши мумкин.

Владимир Путин эса шу куни, 27 декабрда, бирлашган қўшинлар гуруҳининг бошқарув пунктларидан бирига ташриф буюрди. У ерда унга Россия армияси Запорижжя областидаги Гуляйполе ва Донецк областидаги Мирноград (Россия расмийлари Димитров деб атайди) шаҳрини эгаллаб олгани ҳақида ҳисобот берилди. Кремл эълон қилган видеодан кўриш мумкинки, Путин бошқарув пунктида ўтказилган йиғилишни ҳарбий кийимда ўтказган. Faridaily нашри таъкидлашича, октябр ойидан бери Путин фронтдаги вазият бўйича олтинчи марта йиғилиш ўтказмоқда (ва тўртинчи марта ҳарбий кийимда) – бунақаси уруш бошидан буён бунчалик кўп бўлмаганди.

Бундан ташқари, Зеленскийнинг Трамп билан учрашуви олдидан Россия ТИВ сайтида вазирлик раҳбари Сергей Лавровнинг ТАСС агентлигига берган интервюси эълон қилинди. Бу интервюда Лавров «Зеленский режими» ва унинг европалик иттифоқчилари «конструктив музокараларга тайёрлигини кўрсатмаётгани»ни, Евроиттифоқ эса «тинчлик йўлидаги асосий тўсиққа айлангани»ни айтган.

Шунингдек, Россия ТИВ раҳбари Европанинг урушдан кейин Украинага тинчликпарвар контингент юбориш режаларига тўхталган. У Россия томони бу ҳолатда ушбу ҳарбийлар Россия қуролли кучларининг «қонуний нишонига айланиши» ҳақида «юз марта таъкидлагани»ни эслатган. «Европадаги ақлсиз сиёсатчилар учун, умид қиламанки, уларга ушбу интервюни кўрсатишади, яна бир бор такрорлайман: Россия кимгадир ҳужум қилишидан қўрқиш керак эмас. Аммо кимдир Россияга ҳужум қилмоқчи бўлса, жавоб қақшатқич бўлади», – деди Лавров.