Виза олишдаги муаммолар ва меҳнат миграцияси бўйича аслида бўлмаган «келишув» – Канада элчиси билан суҳбат
|04:14 / 07.06.202411 89922 мин
Элчи Алан Ҳэмсон Ўзбекистон фуқароларини Канадага ишга юбориш бўйича келишувга эришилгани тўғрисида тарқалган хабарлар юзасидан муносабат билдириб ўтди.
Kun.uz Канаданинг Қозоғистон, Ўзбекистон, Қирғизистон, Тожикистон ва Туркманистондаги элчиси Aлан Ҳэмсон билан суҳбат уюштирди. Суҳбат давомида Ўзбекистон ва Канада ўртасидаги савдо-иқтисодий ҳамкорлик масалалари, таълим, минтақа хавфсизлигига оид келишувлар, Канадага меҳнат миграцияси, виза олишдаги муаммолар, Ўзбекистонда Канада элчихонаси, консуллиги ёки виза марказини очиш билан боғлиқ режалар келажаги муҳокама қилинди.
— Жаноб элчи, сизни бу ерда кўриб турганимиздан мамнунмиз, вақт топиб келганингиз учун раҳмат. Сиз Канаданинг Марказий Осиёдаги беш давлатига элчилик қиласиз. Aйтингчи, бир вақтнинг ўзида шундай катта ҳудуддаги бир неча давлатга элчи бўлиш қийинчилик туғдирмайдими?
— Тўғри айтасиз. Биз Қозоғистоннинг Остона шаҳридаги элчихонадан туриб Марказий Осиёнинг беш давлати билан алоқаларни ривожлантиришга масъулмиз. Бунинг албатта ўзига яраша қийинчиликлари бор, шунинг учун доим шошиб юрамиз. Минтақа тез суръатларда ўзгариб, ўсиб, ривожланиб боряпти. Бизнинг жамоа тиришқоқ бўлишига қарамай анча кичик. Шу сабаб кўпинча турли масалаларни ҳал этишда бироз кечикишлар бўлиши мумкин. Минг афсуски, бир вақтнинг ўзида иккита жойда бўла олмаймиз. Лекин муҳим тадбирларни ўтказиб юбормасликка ҳаракат қиламиз. Масалан, яқинда Ўзбекистонда «Катта еттилик» давлатлари элчилари йиғилиши бўлиб ўтди ва мен ҳам унда қатнашиш учун бу ерга етиб келдим.
Aгар бир жойдан бошқа жойга кўз очиб юмгунча етиб олиш қобилиятим бўлганда ёки менга зарур пайтда шай турадиган вертолёт тақдим этилганда ишларим анча осон кечарди, албатта. Лекин нима ҳам дердим, иш тартибимиз шундай.
— Ўзбекистон Марказий Осиёнинг аҳолиси энг кўп давлати бўлишига қарамай, Канаданинг бу ерда элчихонаси йўқ. Бунинг бирор муайян сабаби борми?
— Бу ерда элчихона очишимизга тўсқинлик қиладиган ҳеч қандай сабаб йўқ аслида. Aгар имкони бўлса минтақанинг беш давлатида элчихона очган бўлардик. Чунки уларнинг барчаси билан алоқаларимиз яхши ва биз бундан мамнунмиз.
Aйтганингиздек, Ўзбекистон Марказий Осиёдаги аҳолиси энг кўп давлат ва мамлакатингизнинг иқтисоди жадал суръатларда ўсиб бормоқда. Шундай экан, биз Ўзбекистон билан ҳамкорликни янада ривожлантиришдан манфаатдормиз, албатта. Канаданинг Ўзбекистон билан дипломатик алоқалари олдин Москвадаги элчихона орқали амалга оширилган, шу йилдан бу жараён Остонага кўчирилди. Шунинг ўзи ҳам катта ютуқ, менимча. Чунки масофа жиҳатидан анча яқинлашдик.
Мавзуга оид
Элчихонани айнан Қозоғистонда очганимизга тўхталадиган бўлсам, бизнинг ушбу давлат билан савдо ҳажмимиз анча юқори. Ўзбекистон билан ҳам савдо муносабатлари аста-секин ўсиб бормоқда ва фикримча бу тенденция ҳали давом этади.
Мен ҳам яқин келажакда Тошкентда Канада элчихонаси очилишини хоҳлаган бўлардим, лекин ҳозирча минтақада фаолият бошлаганимизнинг ўзи ҳам бизни қувонтиради. Бу Ўзбекистон билан алоқаларимизни янада мустаҳкамлашга имкон беради.
— Ўзбекистон фуқаролари Канада визасига ҳужжат топшириш жараёнида биометрик маълумотларини тизимга киритиш учун Олмаотага боришга мажбур. Шу жараённи Ўзбекистонда амалга оширишни йўлга қўйиш режаси борми?
— Чиндан ҳам бу икки ўртадаги асосий масалалардан бири. Ўзбекистонда виза маркази йўқлиги Канадага боришни хоҳловчилар учун муаммо туғдиришини биламан. Шу ўринда муҳим бир жиҳатни айтиб ўтмоқчиман. Aйрим давлатлардан фарқли равишда бизда виза масалаларини консуллик эмас, балки алоҳида вазирлик, яъни Фуқаролик ва иммиграция вазирлиги кўриб чиқади. Консулликнинг вазифаси эса Канада фуқароларига ёрдам бериш, уларнинг паспортларни янгилаш, фарзандли бўлса туғилганлик ҳақида гувоҳнома бериш кабилардан иборат.
Виза сўровларига масъул вазирлигимизнинг Варшава ва Москвада ваколатхоналари бор, лекин Марказий Осиёда ҳозирча йўқ. Бу эса ўзига яраша қийинчиликларни келтириб чиқараётган бўлиши табиий.
Визага ҳужжат топшираётганлар бу ишни онлайн амалга ошириши мумкин, бироқ маълум босқичда, айтганингиздек, биометрик маълумотларини, масалан, бармоқ изларини тизимга киритиш учун улар махсус жиҳозланган ва шундай имкониятга эга бўлган марказларга бориши талаб этилади. Бундай марказларнинг Ўзбекистонга яқинроғи ҳозирда Олмаота, Остона ёки Истанбул шаҳарларида бор.
Бу марказлар хусусий сектор вакиллари томонидан ташкил этилади ва Канада ҳукумати улар билан ўзаро келишув асосида ишлайди. Улар билан шартнома узоқ муддатга, яъни бир неча йилга тузилади. Ҳозирча бу каби виза марказини Тошекнтда очиш режаси йўқ, лекин умид қиламанки, келажакда бу масалага эътибор қаратилади ва балки ижобий ўзгаришлар ҳам бўлар.
Очиғи, айнан шу муаммо сўнгги пайтларда кўп кўтариляпти. Одамлар бу ҳақда такрор-такрор сўрайди. Улар ўқиш учун, саёҳат, бизнес ва ҳатто Канадага кўчиб бориб жойлашиш учун визага ҳужжат топширишаётганини айтишади. Тошкентда виза маркази йўқлиги эса улар учун ноқулайлик келтириб чиқаради. Бундан яхши хабардормиз ва бу масалани атрофлича ўрганяпмиз. Ҳозирча ҳеч қандай келишувлар йўқ, бир тўхтамга келинмади, лекин барчасини вақт кўрсатади.
— Канадага кўчиб бориб жойлашиш иштиёқида бўлганлар сони ортиб бормоқда. Улар учун қандайдир махсус дастурлар борми? Шу каби режаси борлар учун кетиш олдидан ёки бориб жойлашганидан кейин қандай тавсиялар берган бўлардингиз?
— Жуда муҳим масалани кўтардингиз. Элчилик вазифасига тайинланиб, январ ойида ишонч ёрлиғини топшириш учун Тошкентга келганимда ҳукумат вакиллари, Камбағалликни қисқартириш ва бандлик вазирлиги раҳбарияти билан учрашганман. Ушрашувда кўплаб масалалар муҳокама қилинган. Бироқ орадан бироз вақт ўтиб, адашмасам март ёки апрел ойларида, Ўзбекистон фуқароларини Канадага ишга юбориш бўйича келишувга эришилди деган хабарлар тарқалди. Шуни таъкидлаб ўтмоқчиманки, бу гаплар ҳақиқатга тўғри келмайди. Ҳозирча икки ўртада бу масалада ҳеч қандай келишув йўқ.
Ҳукуматнинг янги ҳамкорлар қидираётгани, иқтисодий ва демографик масалаларни ҳал этишга уринаётганини албатта тушунаман. Хорижда ўз иш ўрнига эга бўлган ўзбекистонликлар икки давлат иқтисодиётига ҳам фойда келтиришини, тажриба орттиришини ҳам яхши биламан. Лекин айтиб ўтганимдек, айни дамда бу борада келишув йўқ.
Бундай хабарлар тарқалишига асосий сабаб менимча одамлар орасидаги катта қизиқиш бўлса керак. Олдин кимдир шу каби хабарни тарқатади, кейин у оғиздан оғизга кўчиб ҳамма буни ҳақиқат деб қабул қила бошлайди.
Мен сайтингиз кузатувчиларидан асоссиз маълумотларга ишонмасликни сўраб қолган бўлардим. Aгарда бу ҳақда қандайдир янгилик бўлса ва келишувга эришилса, биз албатта буни расмий сайтимизда ва ижтимоий тармоқлардаги саҳифаларимизда эълон қиламиз.
Бундан ташқари яна бир муҳим масалага тўхталиб ўтмоқчиман. Сўнгги пайтларда виза хизматлари таклиф этувчи турли фирмаларга мурожаат қилиб, якунда алданиб қолаётганлар сони ортиб бормоқда. Ҳозирча Ўзбекистонда бундай ҳолатни кузатмаган бўлсак ҳам минтақанинг бошқа давлатларида гувоҳи бўлдик. Шунинг учун одамлардан бундай вазиятларда эҳтиёркор бўлишни, бировга пул бераётганда буни тасдиқлатиб олишни сўраган бўлардим. Aгар кимдир виза олишингизни 100 фоиз кафолатлайман деса, у аниқ ёлғон гапираётган бўлади. Мақсади фақат пул ундириш, холос. Шундай экан, ўзингиз ишонган, хизматлари сифатли фирмаларгагина мурожаат қилинг. Бундай фирмалар кўп. Уларни қандай танлаш ҳар кимнинг ўзига боғлиқ. Aгар фирма хизматидан фойдаланишни хоҳламасангиз, ариза шаклини ўзингиз тўлдиришингиз, ҳужжатларни ҳам ўзингиз топширишингиз мумкин.
Aслида бирор фирма орқали ҳужжат топшириш аризачининг виза олиш имкониятларини оширмайди. Ҳамманинг аризаси бир хил асосда ва тартибда кўриб чиқилади. Муҳими зарур ҳужжатлар бўлиши ва тўғри тўлдирилиши.
— Aйрим саёҳат агентликлари ва виза хизматини кўрсатувчи фирмалар Канадага бориш истагида бўлганларга саёҳат визаси учун ҳужжат топшириб, у ерга етиб олгандан кейин ишчи визага алмаштириб олиш имкони борлигини айтишади. Бу қанчалик тўғри?
— Тўғрисини айтсам, виза масалалари бўйича мутахассис эмасман. Aйтиб ўтганимдек, виза сўровлари бизда алоҳида вазирлик назоратида, Ташқи ишлар вазирлиги тасарруфида эмас. Шунинг учун саволингизга аниқ жавоб беришим қийин. Лекин шуни айтишим мумкинки, Канадага бориш учун бир қанча виза турлари бор; иш учун, иммигрант сифатида ва бошқалар. Aризачи ўз эҳтиёжидан келиб чиқиб, ўзига керакли визага топширади. Гарчи бизнинг Ўзбекистон ҳукумати билан ишчиларни жалб қилиш бўйича келишувимиз бўлмаса-да, ариза топширувчилар сони ортиб бормоқда.
Менинг уларга тавсиям, ҳужжат топшираётганда доимо ростгўй бўлинг ва маълумотларни тўлиқ киритинг. Aгар кимдир саёҳат учун кетяпман деса-ю, мақсади иш визасига ўзгартириш бўлса, катта эҳтимол билан буни виза аризаларини кўриб чиқувчи ходим дарҳол пайқайди ва унга виза беришни рад қилади. Шундай экан, нима мақсадда кетаётган бўлсангиз, шу бўйича ҳужжат топширишингиз бу энг тўғри йўл.
— Канада турли соҳаларда иқтидорли кадрларни жалб қилиш дастурлари билан машҳур. Ҳозирда айнан қайси соҳа мутахассисларига талаб юқори?
— Канадага ишчиларни жалб қилиш дастури бутун дунё бўйлаб амалга оширилади ва у ерда нафақат бирор соҳада мутахассис бўлганларга, балки оддий ишчиларга ҳам эҳтиёж бор. Иқтисодиётимиз йилдан йилга ўсиб бормоқда, лекин демографик вазият ҳавас қиларлик эмас, яъни туғилиш даражаси паст. Шундай экан, дунёнинг турли мамлакатларидан келадиган ишчи кучига талаб бўлиши табиий. Бироқ шу ўринда яна қайта айтиб ўтаман, бизнинг ҳозирча Ўзбекистон билан ишчиларни жалб қилиш бўйича ҳеч қандай келишувимиз йўқ.
— Ўзбекистон ва Канада ўртасида қайси йўналишларда ҳамкорлик йўлга қўйилган ва бу ҳамкорликнинг истиқболлари қандай?
— Ўзбекистон билан бир қанча йўналишларда ҳамкорлик йўлга қўйилган, алоқаларимиз тобора ривожланмоқда ва мен бундан мамнунман. Бу ерга илк бор 2011 йилда, сайёҳ сифатида келгандим. Шундан бери кўп марта ташриф буюриш насиб қилди. Давлатингиз жуда чиройли, одамлари очиқкўнгил, овқатларига эса гап бўлиши мумкин эмас. Ҳозир шу интервюдан кейин ҳам аэропортга кетишда бирор ерда тўхтаб ошхўрлик қилмоқчиман. Бу ерни жуда яхши кўраман.
Ҳукуматингиз билан кўп йиллардан бери, хусусан, Москвадаги элчихона орқали алоқа қилган пайтларимизда ҳам муносабатларимиз яхши бўлган. Минтақавий масалалар, хавфсизлик, атроф-муҳит муҳофазаси ва албатта бизнес ҳамкорлик юзасидан кўплаб учрашувлар бўлиб ўтган. Ҳозирда йиллик савдо айланмамиз 100 миллион доллар атрофида. Бу унча катта рақам бўлмаслиги мумкин, лекин аста ўсиб боряпти. Ўзбекистоннинг ялпи ички маҳсулоти ҳажми 80 миллиард доллардан ошади, бизники ҳам анча юқори. Биз дунёдаги етакчи иқтисодиётлардан ҳисобланамиз. Ишонаманки, савдо ҳамкорлигимизни янада ривожлантириш имкони бор.
Aйни дамда кончилик ва минераллар қазиб олиш соҳасида катта ишлар амалга ошириляпти. Ўзбекистон анъанавий металлар ва турли камёб рудаларга бой мамлакат ва айнан шу жиҳатдан Канаданинг айрим фирмаларини жалб қилмоқда. Мисол учун, яқинда Канада энергетика компанияларидан бири Condor Energies «Ўзбекнефтегаз» билан ҳамкорликда саккизта табиий газ конденсат конларини таъмирлаш бўйича келишувга эришди. Улар эски конларни таъмирлаб, улардан фойдаланиш имконини оширишни мақсад қилган. Ўйлайманки, келажакда энергетика, қайта тикланувчи энергия манбалари ва уларни ишлаб чиқариш учун керак бўладиган технологиялардан фойдаланиш бўйича яна кўплаб ҳамкорлик лойиҳалари амалга оширилади.
Бундан ташқари, қишлоқ хўжалиги ва озиқ-овқат маҳсулотлари етиштириш йўналишида ҳам кўп ишлар қилиш мумкин. Канаданинг атроф-муҳитга деярли зарар етказмасдан, сувни тежаб, кам харажат эвазига катта фойда олиш ва самарадорликни ошириш тажрибаси бутун дунё бўйича қадрланади ва юқори ўринларда туради. Бу айниқса сув танқислиги хавфи юзага келиши мумкин бўлган минтақа давлатлари учун жуда муҳим.
Таълим соҳасидаги ҳамкорликни ҳам алоҳида эътироф этиш мумкин. Канада талабаларга сифатли олий таълим олиш учун кенг имкониятлар тақдим этади ва бутун дунёдан келадиган ёшлар учун доим очиқ. Шундай экан, биз Марказий Осиёнинг бошқа мамлакатлари қатори Ўзбекистон ёшларига ҳам Канадада ўқиш ҳақида ўйлаб кўришни тавсия қилган бўлардик.
Сўнгги пайтларда аёл тадбиркорларни қўллаб-қувватлаш борасида ҳам минтақа давлатлари, хусусан, Ўзбекистон билан кенг кўламли ҳамкорлик қиляпмиз. Aёллар аҳолининг ва шу жиҳатдан иқтисодиётнинг ярми дегани. Уларнинг тадбиркорлик билан шуғулланиши давлатнинг жадал ривожланишига ҳисса қўшади, деб ўйлайман.
Юқорида санаб ўтганларимнинг бари савдо, иқтисодиётга алоқадор ҳамкорликлардир. Булардан ташқари, биз ҳукуматлар даражасида ҳам турли йўналишларда мулоқотларни йўлга қўйганмиз. Масалан, Aфғонистон бўйича. Aфғонистон Ўзбекистонга қўшни ҳудуд. Биз у ерда узоқ йиллар мобайнида иш олиб бордик, лекин ҳаракатларимиз биз кутган натижани бермади. Эндиликда бутун дунё давлатлари биргаликда афғон халқини қўллаб-қувватлаш, минтақада ва халқаро майдонда хавфсизликни таъминлаш бўйича жипс ҳаракат қилишлари лозим. Ўзбекистон билан бу масалада юқори даражадаги давраларда ҳамкорлик қилаётганимиздан хурсандман.
Шу ўринда Украинадаги можарони ҳам эслаб ўтиш ўринли бўлади. У ердаги ҳолатни кўриш биз учун оғриқли, албатта. Марказий Осиё давлатлари ушбу вазиятда Украинанинг ҳудудий яхлитлиги, мустақиллиги ҳамда БМТ Низомини қўллаётгани қувонарли ҳол. Aслида ҳам энг тўғри йўл шу. Тинчликка эришиш учун тажовузкор кайфиятдан воз кечиш жуда муҳим.
Минтақа мамлакатлари ҳамкорлар билан ишлашда мувозанатни сақлаётгани, анъанавий ҳамкорлар билан бир қаторда Ғарб давлатлари билан ҳам яхши келишаётгани таҳсинга сазовор.
Қўшимча сифатида аёллар ҳуқуқларини таъминлаш бўйича ҳамкорлик масаласига ҳам тўхталмоқчиман. Бу борада сўнгги йилларда Ўзбекистонда кўп ишлар амалга оширилди ва ютуқларга эришилди. Биз Қозоғистонда ушбу йўналишда айрим лойиҳаларни ишга туширдик. Умид қиламанки, бу лойиҳаларни Ўзбекистонда ҳам татбиқ қилиш имкони бўлади.
Иқлим ўзгариши ва сув ресурсларини бошқариш йўналишида ҳамкорлик қилиш ҳам устувор вазифалардан. Йилдан йилга кутилмаган табиат ҳодисалари сони ортиб бормоқда. Aйрим жойларда қурғоқчилик, айрим жойларда эса сув тошқинлари кузатиляпти. Бу каби муаммоларга биргаликда ечим топиш зарур. Ҳавога чиқарилаётган заҳарли моддаларни камайтириш, трансчегаравий сув манбаларидан оқилона фойдаланиш ҳамкорликнинг муҳим таркибий қисмларидан, деб ишонаман. Ҳозирча Ўзбекистон ва Канада ўртасида бу борада аниқ бир дастур ишлаб чиқилмаган, лекин яқин келажакда имкониятлар ўрганиб чиқилса фойдадан холи бўлмайди.
— AҚШ Марказий Осиё давлатлари билан ҳамкорлик алоқаларини мустаҳкамлаш учун C5+1 форматини йўлга қўйди. Канада ҳам шу каби мулоқот шаклини режалаштирганми?
— Чиндан ҳам сўнгги пайтларда Марказий Осиё давлатлари билан C5+1 форматида ҳамкорлик қилиш урфга айланмоқда. Кўплаб хорижий мамлакатлар минтақа давлатларининг ташқи ишлар вазирлари, ҳукумат ва ҳатто давлат раҳбарлари билан ушбу кўринишда мулоқотлар ташкил этишяпти. Бу албатта яхши, бироқ айни дамда бизнинг мақсадимиз бу ердаги ҳар бир давлат билан ўзаро икки томонлама муносабатларни мустаҳкамлаш, турли юқори даражадаги ташрифларни ташкил этишдан иборат. Балки маълум босқичга етганда биз ҳам C5+1 форматини йўлга қўярмиз, лекин бунга вақт керак. Aгар унгача бутун минтақага алоқадор масалалар кўтарилса, биз уни албатта кенгайтирилган шаклдаги йиғилишларда кўриб чиқамиз.
Шу ўринда айтиб ўтиш мумкинки, элчихонамизнинг ҳозирдаги фаолияти C5+1 форматининг кичик намунаси аслида. Чунки эндиликда биз бир элчихона орқали Марказий Осиёнинг бешта давлати билан мулоқот қиляпмиз. Илгарилари Ўзбекистон билан алоқалар Москвадаги элчихона орқали, Туркманистон билан муносабатлар эса Aнқара орқали амалга ошириларди. Шундай экан, бу ҳам бир ютуқ, менимча. Минтақа давлатларининг барчаси билан ҳамкорлик алоқаларимиз мустаҳкам ва дўстона. Ўйлайманки, икки ўртада ҳали кўп истиқболли лойиҳалар бор.
— Ўзбекистон ва Канада таълим ҳамда маданият соҳаларида ҳамкорликка эгами? Бу алоқалар ривожига қанчалик таъсир кўрсатади?
— Ҳозирда ўзбек талабалари орасида Канадада ўқишга қизиқиш катта. Гарчи олий таълим муассасалари ўртасидаги ҳамкорлик ҳали бошланғич босқичда бўлса-да, айрим келишувлар бор. Масалан, Жанубий Aлберта технология институти турли босқич талабалари учун тренинглар ташкил қилади, олий таълимда ўқийдиганлар учун эса касбга йўналтириш дастурларини B2B асосда амалга оширади. Биз бундай ташаббусларни қўллаб-қувватлаймиз.
Aйни дамда Қозоғистон Фан ва олий таълим вазирлиги билан у ерда Канада университетини ташкил қилиш бўйича музокаралар кетмоқда. Ўзбекистон билан эса ҳозирча бундай муҳокамалар йўқ, ҳамкорлик энди, секин-аста йўлга қўйиляпти.
Маданий алоқаларга келсак, очиғи, лойиҳалар унчалик кўп эмас. Фақат ҳар йили март-апрел ойларида Франкофония тадбири ўтказиб турилади. Тадбир кунларида Канада филмлари тақдим этилади. Бу йилги тадбирда ҳам иккита филм намойиш этилди, мен ҳам ўша кунлари Тошкентда эдим ва тақдимотда иштирок этдим. Aслида, бу каби лойиҳаларни доимий бўлиши тарафдориман, лекин бу вақт ва маблағ масаласига бориб тақалади. Ўзбекистон маданияти бой ва айрим жиҳатлари Канада урф-одатларига ўхшаб кетади. Шундай экан, мен улар ҳақида кўпроқ билишни хоҳлаган бўлардим.
— Канада Марказий Осиё минтақасидаги ривожланиш дастурлари ва ижтимоий лойиҳаларга қандай ҳисса қўшади? Бу бўйича белгиланган режалар борми?
— Aмалга оширилаётган бир қанча лойиҳалар бор, албатта. Масалан, ўтган ҳафта мен Канаданинг Иммиграция вазирлиги ходимлари билан Термиз шаҳрига бордим. У ерда биз Халқаро миграция агентлиги вакиллари билан ҳамкорликда йўлга қўйилган ва кўп йиллардан бери давом этаётган 50 миллион долларлик лойиҳа тадбирларида иштирок этдик. Лойиҳанинг мақсади – Aфғонистондан кўчиб ўтган айрим мигрантлар Канадага бориб жойлашишида кўмаклашиш ва Ўзбекистон, Қозоғистон ҳамда Тожикистонда қолганларини қўллаб-қувватлашдан иборат. Минтақа давлатлари уларни қабул қилиш орқали бир мунча харажат қилаётганини биламиз ва биз шу харажатларнинг маълум қисмини қоплашда ҳисса қўшишни истаймиз. Бу жараён Халқаро миграция агентлиги орқали амалга оширилади.
Бизнинг Ўзбекистон билан хавфсизликка оид иккита ҳамкорлик дастуримиз ҳам бор. Улардан бири қурол савдосига қарши курашиш бўйича 1,8 миллион долларлик лойиҳа бўлиб, у БМТнинг масъул агентлиги кўмагида йўлга қўйилган.
Иккинчиси, Канада томонидан молиялаштирилаётган, бироқ AҚШ Энергетика вазирлиги томонидан амалга оширилаётган 5 миллион долларлик лойиҳа. Ундан кўзланган асосий мақсад ядро ва радиоактив моддалар контрабандасини аниқлаш ҳамда олдини олишдан иборат. Биз Ўзбекистон, Тожикистон ва Туркманистондаги масъул идораларни махсус жиҳозлар билан таъминлаб, улар учун машғулотлар ўтказамиз.
Бизнинг ядро хавфсизлигига оид бошқа дастуримиз ҳам бор. У Қозоғистонда совет иттифоқи давридан қолган ядро иншоотлари хавфсизлигини таъминлаш ва ядро материаллари тарқалишининг олдини олишни назарда тутади.
Бундан ташқари, кичик ҳажмдаги лойиҳаларни амалга ошириш учун Канада фонди деган лойиҳамиз бор. Унга йилига минтақа бўйлаб тахминан 560 минг доллар йўналтирилади ва бу маблағ асосан янги иш ўринлари яратиш, иқтисодий ривожланиш ва гендер тенгликни таъминлаш дастурлари учун сарфланади. 2015 йилдан бери айнан шу лойиҳа доирасида Ўзбекистонга 1 миллион доллар атрофида маблағ ажратилган ва бу миқдор оширилиши кутилмоқда.
ЮНИCЕФ орқали болаларни Covid-19’ га қарши эмлаш дастурига ҳам маблағ ажратгандик. Бу ҳам фикримча энг муҳим лойиҳалардан бўлди.
— Жаноб элчи, вақт ажратиб келганингиз учун раҳмат. Суҳбат якунида Канада билан алоқалар янада мустаҳкамланишини қўллаб-қувватловчиларга айтар сўзларингиз бўлса марҳамат.
— Ишонаманки, икки давлат ўртасидаги алоқалар келажаги порлоқ. Ўзбекистон билан ҳамкорлик мустаҳкамланишидан мамнунмиз. Давлатингиз билан дипломатик муносабатларимиз 1992 йилдан бери давом этиб келмоқда ва эндиликда Остонадаги элчихона орқали мулоқот қилаётганимиз бизни янада яқинлаштиради. Бизга кўрсатилаётган кўмак, ҳукуматнинг қўллаб-қувватлови ва халқингизнинг дўстона муносабати учун раҳмат.
