"International Paper" компанияси Ўзбекистонда Spunlace номли нотўқима материал ишлаб чиқаришни илк бор йўлга қўйди

2000 йилдан буён компаниямиз ELMA бренди остида санитария-гигиена маҳсулотларини ишлаб чиқариб келмоқда. Мамлакатимизда муҳтарам президентимиз Шавкат Миромонович Мирзиёев раҳбарлигида амалга оширилаётган иқтисодий ислоҳотлардан илҳомланиб, биз ўзимиз учун янги йўналиш – Spunlace нотўқима материал ишлаб чиқаришни ўзлаштиришга қарор қилдик ва шу йили Европа технологиялари асосида ишлаб чиқаришни йўлга қўйдик.

Лойиҳа Франциянинг ушбу соҳадаги етакчи компанияларидан бири – ANDRITZ Perfojet SAS билан ҳамкорликда амалга оширилди. Лойиҳани молиялаштириш Uzbek Leasing International AO билан ҳамкорликда олиб борилди. Лойиҳанинг умумий қиймати 10 миллион еврони ташкил этди.

Spunlace нотўқима материали нам хушбўй салфеткалар, гигиеник салфеткалар, сочиқлар ва шунга ўхшаш маҳсулотлар ишлаб чиқаришда қўлланади. Юқори сифатли европалик ускуналар ва энг сўнгги модификацияларга таянадиган International Paper LLC компанияси юқори сифат ва кўрсаткичларга эга нотўқима материал ишлаб чиқармоқда. Ушбу материал қўшимча равишда тагликлар, бир марталик пеленкалар, артиш учун мўлжалланган салфеткалар, тиббий мақсадларда ишлатиладиган буюмларни ишлаб чиқаришда ҳам фойдаланилиши мумкин.

Юқоридагилар мамлакатимиз аҳолисининг ортиб бораётган эҳтиёжларини қондириш йўлида янги турдаги маҳсулотлар ишлаб чиқаришга маҳаллий тадбиркорликка кенг имкониятлар очиб беради. Ускунанинг йилига 10 минг тонна маҳсулот ишлаб чиқариш қуввати Ўзбекистон тадбиркорларининг ушбу турдаги хомашёга бўлган талабини тўлиқ таъминлайди. Бу эса кичик ва ўрта бизнеснинг изчил ривожланишига, янги иш ўринлари яратилишига ва мамлакатимизда импорт ўрнини босиш жараёнини жадаллаштиришга хизмат қилади. Шунингдек, мазкур маҳсулот Марказий Осиё давлатларидаги ишлаб чиқарувчилар эҳтиёжини ҳам қондириш имкониятини яратади.