Россияда доллар курси 62 рублдан пасайди

Москва биржасида доллар курси 2015 йил октябридан бери биринчи марта 62 рублдан пастроққа тушди. Маълумотларга кўра, долларга 61,98 рубль берилган.   

Евронинг курси эса 69,39 рублни ташкил қилди. Евро, аксинча, аввалги савдо сессиясига нисбатан 14 тийинга қимматлаган. 

Россия Марказий банки доллар ва евронинг 8 октябрга курсини  62,3 ва 69,23 рубль қилиб белгилади.

Рубль нефть нархларининг ўзгариши ортида долларга нисбатан қимматлашмоқда. 7 октябрда Brent маркасидаги нефтнинг бир баррели нархи 52,45 долларни ташкил қилган ва 6 октябрдаги нархдан 0,1 фоизга арзонлашган. 7 октябрдаги савдолар вақтида нефть нархи гоҳ 52,8 долларгача кўтарилиб, гоҳ 51,9 долларгача тушиб турди.