Нобел қўмитаси тинчлик мукофоти совриндорини Ғазо бўйича келишувдан олдин танлаб бўлган

Нобел қўмитаси Ғазо бўйича тинчлик келишуви тузилишидан олдин 2025 йилги тинчлик мукофоти совриндорини тасдиқлади, деб ёзди Le Monde Норвегия Нобел институти вакили Эрик Осхайм баёнотига таяниб. Сўнгги йиғилиш 6 октябр, душанба куни бўлиб ўтди.

- Охирги ишлар душанба куни бажарилди, - деди Осхайм.

Унинг қўшимча қилишича, Нобел қўмитаси ўз қарори санасини ҳеч қачон ошкор қилмайди.

Осхайм сўзларига кўра, тинчлик мукофоти лауреати номи эълон қилинишидан олдин қўмитанинг янги йиғилишлари режалаштирилмаган. Тинчлик мукофоти совриндори номи 10 октябр куни эълон қилинади.

Нашрнинг қайд этишича, бўлажак тинчлик бўйича Нобел мукофоти совриндори ҳақидаги қарор АҚШ президенти Доналд Трамп воситачилигида Исроил ва ҲАМАС тинчлик режасининг биринчи босқичи доирасидаги келишувларни имзолашидан олдин қабул қилинган.

Трамп аввалроқ таъкидлаганидек, «ҳамма ўзининг тинчлик учун Нобел мукофотини олиши кераклигини айтмоқда». Америка президентининг таъкидлашича, у ва АҚШ 2020 йилда Исроил ва бир қатор араб давлатлари ўртасидаги дипломатик муносабатларни нормаллаштириш бўйича келишув учун етарлича эътирофга сазовор бўлмаган. Шунингдек, у камида олти ёки етти урушга чек қўйганини бир неча бор таъкидлаган.

Шу билан бирга, Трамп мукофотни олишни кутмаётганини айтиб, «улар уни ҳеч нарса қилмаган йигитга беришини» таъкидлаган. Трамп сўзларига кўра, бундай ҳолат АҚШ учун «катта ҳақорат» бўлади.