Тожикистон ТИВ раҳбари «Крокус» терактида гумонланувчилар қийноққа солинганини қоралади

Тожикистон ташқи ишлар вазири Сирожиддин Муҳриддин «Крокус Сити Ҳолл»да содир этилган терактни тергов қилаётган Россия ҳуқуқ-тартибот органлари халқаро ҳуқуқ нормалари ва принципларига, айниқса айбсизлик презумпцияси ва қийноқларга тақиқ ҳақидаги қисмига риоя этиши кераклигини айтди. «Азия-Плюс» нашри хабарига кўра, у бу ҳақда 12 апрел куни Минскда МДҲ давлатлари ташқи ишлар вазирлари кенгаши йиғилишида тўхталиб ўтган. 

«Очиқ ахборот майдонида террорчилик акти содир этишда гумонланаётганларга тан жароҳати етказиш тарзидаги қийноқлар қўлланган ҳолда ҳибсга олингани акс этган тасвирларни намойиш этишга йўл қўйиб бўлмайди. Бу йўл билан олинган иқрорлар қиймати барчага яхши маълум», — деган вазир.

ТИВ раҳбари шунингдек «яхши ўйланмаган ахборот кампанияси» натижасида «Тожикистон фуқаролари ва тожикларга нисбатан салбий тушунча шаклланаётгани»ни қайд этиб ўтган. 

Унинг сўзларига кўра, Тожикистон теракт бўйича тергов холис ва адолатли бўлишини, барча: «ташкилотчилар ҳам, ижрочилар ҳам, шериклар ҳам, ушбу қўрқинчли жиноят буюртмачилари ҳам» жазога тортилишини кутмоқда.

Аввалроқ Тожикистон бандлик вазирлиги «Крокус» терактидан кейин Россияда тожикистонликларга зулм ўтказиш ҳолатлари ортгани ва мамлакат фуқаролари Россияни ёппасига тарк эта бошлагани ҳақида маълум қилганди. Ижтимоий тармоқларда «Крокус» учун «қасос» сифатида ушбу республика вакилларига қилинган ҳужумлар ҳақида хабарлар пайдо бўлган.

• 22 март куни кечқурун қуролланган шахслар Москва чеккасидаги Красногорск шаҳрида «Крокус Сити Ҳолл» концерт залига бостириб кирганди. Улар «Крокус» ходимлари ва концертга келганларни ўққа тутган, кейин эса залга ўт қўйиб юборганди. Натижада 144 киши ҳалок бўлди, 500 дан ортиқ киши яраланган.
• 25 март куни Москвадаги Басманний район суди терактни ижро этишда гумонланаётган тўрт кишини қамоққа олди — Далержон Мирзоев, Саидакрами Ражабализода, Муҳаммадсобир Файзов ва Шамсиддин Фаридуни. Суд залида олинган фотосуратлар ва видеоларда айбланувчилар калтаклангани излари кўриниб турган: Мирзоевнинг бўйнида қийноқ чоғида қўлланган пакет парчаси қолган, Ражабализоданинг бир қулоғи бинтланган, қўлга олиш чоғида кучишлатар идоралар ходимлари унинг ўнг қулоғининг бир қисмини кесиб олиб, оғзига солиб қўйишганди, Файзовни эса судга каталкада олиб келишган — телеграм-каналларда тарқалган маълумотга кўра, қўлга олиш чоғида унинг бир кўзи ўйиб олинган.
• Теракт бўйича жами 11 киши қўлга олинган. Уларнинг бир нафаридан бошқа барчаси — Тожикистон фуқароларидир.