Трамп: Венесуэла АҚШга 30–50 млн баррел нефт етказиб беради

Венесуэланинг ўтиш давридаги ҳокимияти АҚШга 30–50 миллион баррел “юқори сифатли, санкциялар остидаги нефт” етказиб беради. Бу ҳақда АҚШ президенти Доналд Трамп ўзининг Truth Social ижтимоий тармоғида 7 январ, чоршанба куни маълум қилди — бу АҚШ Венесуэла раҳбари Николас Мадурони қўлга олиш мақсадида ўтказган ҳарбий операциясидан бор-йўғи бир неча кун ўтганидан кейин содир бўлди.

“Ушбу нефт бозор нархида сотилади ва пуллар Венесуэла халқи ҳамда Қўшма Штатлар манфаатига хизмат қилишига кафолат бериш учун мен — АҚШ президенти сифатида уларни назорат қиламан”, — деб ёзди Америка раҳбари. Трампнинг сўзларига кўра, у АҚШ энергетика вазири Крис Райтга “ушбу режани дарҳол амалга ошириш” топшириғини берган. Унинг постига биноан, Венесуэла нефти кемалар-омборлар орқали олиб кетилади ва тўғридан тўғри АҚШдаги тушириш пирсларига етказилади.

“Гап катта пуллар ҳақида кетяпти”, — деб қайд этади dpa агентлиги. Охирги ойлар давомида Доналд Трамп Каракас ҳокимиятини Венесуэладан АҚШга наркотрафикка кўмаклашишда айблаб келган ва бу орқали Қўшма Штатлар ҳамда унинг фуқароларининг миллий хавфсизлигига таҳдид солаётганини айтган. Ўз навбатида Венесуэла Вашингтонни унинг табиий ресурсларини қўлга киритиш истагида айблаган.

Венесуэла ҳудудидаги нефт захиралари дунёдаги энг йирик аниқланган захиралар ҳисобланади. 2005 йилгача бу мамлакат АҚШ учун нефтнинг энг йирик етказиб берувчиси бўлган. Бироқ вазият тубдан ўзгарди: 2007 йилда Венесуэланинг ўша пайтдаги раҳбари Уго Чавес саноатни миллийлаштиришни амалга ошириб, шу жумладан, мамлакатда ишлаётган Америка компанияларига тегишли мулкларни ҳам мусодара қилган.

3 январ куни тунги пайт Венесуэлада америкалик ҳарбийлар томонидан ўтказилган ҳарбий операциядан сўнг Трамп АҚШ компаниялари “мамлакатга келиб, миллиардлаб доллар сарфлайди ва вайрон бўлган инфратузилмани тиклайди”, деб маълум қилган.

Шу орада Венесуэланинг вақтинчалик президенти Делси Родригес 6 январ куни телевидение орқали қилган мурожаатида Николас Мадуро АҚШ томонидан қўлга олинганидан кейин Венесуэла “ташқаридан бошқариляпти” деган даъволарни рад этди. “Мамлакатимизни Венесуэла ҳукумати бошқаради, бошқа ҳеч ким эмас. Венесуэлани бошқарадиган ҳеч қандай хорижий актор йўқ”, — деб таъкидлади у.

Родригес, шунингдек, АҚШ ҳарбий операцияси қурбонлари хотирасига мамлакатда етти кунлик мотам эълон қилинганини билдирди. Венесуэла ҳокимияти маълумотларига кўра, ушбу операция давомида 24 нафар венесуэлалик ҳарбий хизматчи ҳалок бўлган. Илгарироқ Гавана Венесуэлада хавфсизликни таъминлаш соҳасида хизмат қилган 32 нафар кубаликнинг ҳалок бўлганини маълум қилган эди.