2021 йилда газ ва электр энергияси истеъмоли учун тарифлар оширилмайди

Kun.uz мухбирининг хабар беришича, ялпи мажлисда қонун лойиҳасига киритилган ушбу норма фуқароларга енгиллик яратиш ва пандемия даврида уларни ҳар томонлама қўллаб-қувватлаш мақсадида амалга оширилаётгани таъкидлаб ўтилган.

Эслатиб ўтамиз, октябр ойи охирида президент Шавкат Мирзиёев 2021-2022 йилларда электр энергияси тарифларини ўзгартиришсиз сақлаб қолиш бўйича топшириқ берганди. «Ҳудудий электр тармоқлари» компанияси бошқаруви раиси Улуғбек Мустафоев давлат раҳбари электр энергияси корхоналарини модернизация ва реконструкция қилиш ишларини тарифларни ошириш эмас, балки ишлаб чиқариш харажатларини камайтириш ҳисобида амалга ошириш бўйича топшириқ берганини маълум қилганди.

• Маълумот учун, Ўзбекистонда табиий газ ва электр энергияси тарифлари сўнгги бор ўтган йилнинг 15 августида ошганди. Дастлаб нархларни 2019 йил 1 июндан ошириш режалаштирилган, бироқ муддат кечиктирилганди.
• 2019 йил 15 августдан эса аҳолига етказиб берилаётган 1 кубометр табиий газнинг баҳоси ҳисоблагич бўлганда 380 сўм этиб белгилаганди. Ҳисоблагич бўлмаганда овқат пишириш ёки совуқ сувни иситиш учун ишлатиладиган газнинг нархи 660 сўм, хонани иситиш учун эса 380 сўм бўлганди.
• Шунингдек, маиший истеъмолчилар учун 1 кВт·с электр энергияси нархи 250 сўмдан 295 сўмга оширилган, бошқа тоифадаги истеъмолчилар учун 450 сўм этиб белгиланганди.