Норозиликлардан кейин ЖЧ учун 60 долларлик чипталар чиқарилади

Бундай арзон чипталар чекланган миқдорда бўлади ва ҳар бир ассоциация учун ажратилган квотанинг 10 фоизини (стадиондаги жами ўриндиқларнинг 1,6 фоизи миқдорида) ташкил этади.

Фото: Fabrice Coffrini/AFP via Getty Images

ФИФА 2026 йил ёзида АҚШ, Канада ва Мексика яшил майдонларида бўлиб ўтадиган футбол бўйича жаҳон чемпионати учун 60 долларлик арзон чипталарни сотувга чиқаришни режалаштирмоқда. Бундай қарор бутун дунё бўйлаб футбол мухлисларининг чипталар нархи бўйича билдирган кескин эътирозларидан кейин қабул қилинди.

«2026 йилги футбол бўйича жаҳон чемпионати саралашидан ўтган миллий жамоаларнинг мухлислари футболнинг энг катта аренасида ўз жамоаларини кузатиб боришини янада арзонлаштиришга қаратилган махсус чипта тарифидан фойдаланиши мумкин бўлади», – дейилади ФИФА баёнотида.

Supporter Entry Tier деб номланадиган бундай чипталар турнирдаги барча 104 ўйинга, шу жумладан финалга ҳам амал қилади, аммо уларнинг сони чекланган.

ФИФА маълумотига кўра, бундай чипталар жамоаси мундиалга йўлланма олган миллий футбол ассоциациялари учун ажратилган квотанинг атиги 10 фоизини ташкил қилади ва унинг нархи 60 долларга тенг.

Ҳар бир жамоага ўйин учун чиқарилган жами чипталарнинг 8 фоизи берилишидан келиб чиқиб айтиш мумкинки, бундай арзон чипталар стадиондаги жами ўринлар сонининг 1,6 фоизи миқдорида (ҳар икки жамоага 0,8 фоиздан) чиқарилади.

Миллий ассоциациялар футбол мухлисларига ушбу чипталарни ўз дастурлари доирасида тақсимлайди. ФИФА мажбурий талаблар қўймаган, лекин «садоқатли мухлислар» чипта олишда устуворликка эга бўлиши кераклигини тавсия этган.

Фанатларнинг «хиёнат» бўйича айблови

ФИФАнинг бу эълони кўплаб мухлислар 2026 йилги жаҳон чемпионатининг биринчи турида нархлар 140 доллардан 2735 долларгача бўлиб кетганидан қаттиқ норозилик билдириши ортидан берилди.

Плей-офф ўйинлари учун нархлари янада юқори эди, хусусан Ню Жерсида бўлиб ўтадиган финал учун чипталар нархи 4 185 доллардан 8 680 долларгача белгиланган.

Бу аввалги жаҳон чемпионатларидаги кўрсаткичдан анча юқори. Масалан, Қатарда бўлиб ўтган сўнгги мундиал финалига энг қиммат чипта нархи 1600 доллар атрофида бўлган.

Аввалги жаҳон чемпионатларидан фарқли ўлароқ, ФИФА ҳозирча нархлар рўйхатини эълон қилмади, аксинча, уларни эълон қилмасдан турли савдо витриналарида ўзгартирди. Ўтган ҳафта ФИФА ўзининг сўнгги лотерея ойнасини очганидан сўнг мухлислар нархлар ўзгарганидан хабар топишди, бу эса мухлисларга 13 январгача чипталар учун ариза топшириш имконини беради.

Тайёрлаган: Азиз Қаршиев

#ФИФА #мундиал чиптаси