Байрам кунлари якшанбага тўғри келса, эртаси куни ҳам дам олиш куни бўлади — қонун лойиҳаси

Бугун, 11 октябрь куни ЎзЛиДеПнинг Олий Мажлис Қонунчилик фракцияси “Ўзбекистон Республикасининг Меҳнат кодексини тасдиқлаш тўғрисида”ги қонун лойиҳасини маъқуллади.

Қуйи палата ахборотига кўра, янги кодексда дам олиш куни ишланмайдиган байрам кунига тўғри келган тақдирда, дам олиш куни байрамдан кейинги кунга кўчирилиши белгиланяпти.

Бу дегани қонунчиликда белгиланган байрам кунлари агар якшанба кунига тўғри келса, унда душанба куни дам олиш кунига қўшиб берилади.

Амалдаги қонунчиликка кўра, Ўзбекистонда йилнинг 9 куни ишланмайдиган байрам куни деб белгиланган. Булар қуйидагилар: 1 январь – Янги йил, 8 март – Хотин-қизлар куни, 21 март – Наврўз байрами, 9 май – Хотира ва қадрлаш куни, 1 сентябрь – Мустақиллик куни, 1 октябрь – Ўқитувчи ва мураббийлар куни, 8 декабрь – Конституция куни, шунингдек, Рамазон ва Қурбон ҳайит байрамларининг биринчи кунлари.

Янги таҳрирдаги Меҳнат кодекси ҳозирда лойиҳа кўринишида бўлиб, қонуний кучга эмас. Лойиҳа Қонунчилик палатаси ялпи мажлисида қабул қилиниб, Сенат томонидан маъқулланиб, президент томонидан имзолангач, белгиланган муддатда кучга киради.