Nukusda ikki kishi noma’lum moddadan zaharlandi. Ulardan biri vafot etgan

Qoraqalpog‘istonning Nukus shahrida ikki nafar fuqaro noma’lum etiologiyali modda ta’sirida zaharlandi. Bu haqda shahar hokimining 6 yanvarda qabul qilingan baxtsiz hodisa sabablarini tekshirish va oqibatlarini bartaraf etish to‘g‘risidagi qarorida ma’lum qilingan. 

Hujjatda keltirilishicha, voqea 2023 yilning 29 dekabr kuni Nukus shahri 23-kichik tumanidagi xonadonlarning birida sodir bo‘lgan. Baxtsiz hodisa oqibatida 2 fuqaro Respublika tez tibbiy yordam ilmiy markazi Qoraqalpog‘iston filialiga yotqizilgan. Ko‘rsatilgan tibbiy muolajalarga qaramay, ulardan biri vafot etgan.

Baxtsiz hodisaning kelib chiqish sabablarini aniqlash uchun komissiya tuzilgan.

Oldinroq Qoraqalpog‘iston respublikasi Chimboy tumanida bir oilaning 5 nafar a’zosi is gazidan zaharlanib, vafot etgandi.