Shavkat Mirziyoyev va Vladimir Putin iqtisodiy hamkorlikni muhokama qildi

Sankt-Peterburg shahriga amaliy tashrif doirasida O‘zbekiston prezidenti Shavkat Mirziyoyev Rossiya prezidenti Vladimir Putin bilan uchrashdi.

Muzokaralarda O‘zbekiston va Rossiya o‘rtasidagi keng qamrovli strategik sheriklik hamda ittifoqchilik munosabatlarini yanada mustahkamlash masalalari ko‘rib chiqildi.

Tomonlar savdo-iqtisodiy hamkorlikning ijobiy sur’atlarini yuqori baholadi. Qayd etilishicha, joriy yil boshidan buyon ikki mamlakat o‘rtasidagi tovar ayirboshlash hajmi 20 foizga oshgan.

Shuningdek, sanoat, energetika, metallurgiya, transport, kimyo sanoati va iqtisodiyotning boshqa ustuvor tarmoqlarida amalga oshirilayotgan yirik qo‘shma loyihalarning borishi muhokama qilindi.

Uchrashuv chog‘ida tovar ayirboshlashdagi yuqori sur’atlarni saqlab qolish, kooperatsiya loyihalarini jadallashtirish hamda hududlararo hamkorlikni kengaytirish muhimligi ta’kidlandi.

Madaniy-gumanitar aloqalarni rivojlantirish masalalariga ham alohida e’tibor qaratildi. Jumladan, Mariinskiy teatrida Georg Fridrix Gendelning “Tamerlano” operasi premerasi o‘tkazilgani va “Ermitaj” davlat muzeyida O‘zbekiston amaliy san’ati ko‘rgazmasi ochilgani qayd etildi.

Suhbat yakunida davlat rahbarlari bo‘lajak ikki tomonlama va ko‘p tomonlama tadbirlar rejasini ham muhokama qildi.