Toshkent va Jizzaxda hokim yordamchilari pora bilan ushlandi

Yer olib berish va ishga joylashtirishni va’da qilib, evaziga pora olganlarga nisbatan jinoyat ishi qo‘zg‘atildi.

Toshkent viloyati va Jizzax viloyatida hokim yordamchilari pora bilan ushlandi, deb xabar berdi DXX.

Davlat xavfsizlik xizmatining (DXX) Toshkent viloyati bo‘yicha boshqarmasi xodimlari va Bosh prokuratura huzuridagi Departament bilan hamkorlikda o‘tkazilgan tezkor tadbirda, Toshkent viloyati, O‘rtachirchiq tumanida hokim yordamchisi lavozimida ishlovchi K.M. mansabdor tanishlari orqali «Yashil makon» umummilliy loyihasi doirasida fuqaroga 1,8 gektar yer maydonini 10 yil muddatga ijaraga olib berish evaziga 15 ming AQSh dollari talab qilib, oldindan 13 ming AQSh dollari olgan vaqtida ushlangan.

Shuningdek, Jizzax viloyati, G‘allaorol tumanida hokim yordamchisi lavozimida ishlovchi I.K. vakolatli tanishlari ko‘magida fuqaroni tuman tibbiyot birlashmasiga ishga kiritib qo‘yish evaziga 1200 AQSh dollari olgan vaqtida ushlangan.

Holatlar yuzasidan jinoyat ishi qo‘zg‘atilgan.