Uy-joy kommunal xizmat ko‘rsatish xizmatining eng yaxshi xodimlari mukofotlanadi

"Uy-joy kommunal xizmat ko‘rsatish a'lochisi" ko‘krak nishoni Vazirlar Mahkamasining 11.12.2018 yildagi 1004-son qarori bilan ta'sis etildi.
 
Norma’ning yozishicha, u har yili uy-joy kommunal xizmat ko‘rsatish sohasi rivojiga munosib hissa qo‘shgan, shuningdek:

• mamlakat aholisining uy-joy sharoitlarini yaxshilash;
• muhandislik kommunikatsiyalarini o‘z vaqtida sifatli qurish va ta'mirlash, ularning atrofidagi hududlarni obodonlashtirish;
• uy-joy kommunal xizmatlar ko‘rsatish tashkilotlarining moddiy-texnika bazasini mustahkamlash va zamonaviy uskunalar bilan jihozlash ishlarida yuqori natijalarni qo‘lga kiritgan shaxslarga topshiriladi.
 
XUMSh, ichimlik suvi va issiqlik ta'minoti korxonalari hamda uy-joy kommunal xizmat ko‘rsatish sohasidagi boshqa tashkilotlar xodimlari (shu jumladan, shaxslar-norezidentlar) mukofot olishlari mumkin.
 
Dastlabki takliflar har yili 25 yanvargacha Qoraqalpog‘iston Respublikasi UJKX vazirligi, viloyatlar UJKX boshqarmalari hamda Toshkent shahar UJKX bosh boshqarmasiga taqdim etiladi. U yerda ular o‘rganiladi va 25 fevralgacha respublika UJKX vazirligiga yuboriladi. Nomzodlarning yakuniy ro‘yxatini u tomondan tuziladigan Komissiya shakllantiradi.
 
Ko‘krak nishoni har yili Uy-joy kommunal xizmat ko‘rsatish sohasi xodimlari kuni (18 aprel) arafasida topshiriladi. Mukofotlangan shaxslar EKIHning 4 baravari miqdorida bir yo‘la to‘lanadigan pul mukofoti oladilar.
 
Hujjat 12.12.2018 yildan kuchga kirdi. 

Eslatib o‘tamiz, avvalroq O‘zbekistonda yana bir ko‘krak nishoni ta'sis etilishi xabar berilgandi.