O‘zbekistonda Xalqaro ziyorat turizmi haftaligi o‘tkaziladi

1–3 noyabr kunlari O‘zbekistonda Xalqaro ziyorat turizmi haftaligi bo‘lib o‘tadi. Bu haqda Turizm va madaniy meros vazirligi ma’lum qildi.

“Xalqaro haftalikdan ko‘zlangan asosiy maqsad – mamlakatda ziyorat turizmi salohiyatini yuzaga chiqarish, O‘zbekistonni jahon sivilizatsiyasining muhim markazlaridan biri sifatida tanitish, jahon hamjamiyati va xalqaro tashkilotlar tomonidan e’tirofga sazovor bo‘lish, shuningdek, ziyorat turizmi xizmatlarini diversifikatsiya qilish va turizm eksportini oshirishdan iborat.

Turizm haftaligi Turizm va madaniy meros vazirligi tashabbusi bilan qator tashkilotlar hamkorligida o‘tkazilmoqda”, – deyiladi xabarda.

Qayd etilishicha, haftalik doirasida ziyorat turizmini rivojlantirish, mavzuga oid suvenirlarni targ‘ib etishga qaratilgan ko‘rgazmalar, seminarlar, ilmiy-amaliy konferensiyalar va madaniy-ma’rifiy tadbirlar o‘tkaziladi.

Haftalik dasturidan Samarqand shahridagi yangi “Ipak yo‘li” turistik markazining ochilishi, “Xiva – islom olami turizmi poytaxti” mavzusiga bag‘ishlangan Xalqaro hunarmandchilik ko‘rgazmasi, “Jahon ustalari” yarmarkasi va boshqa tadbirlar o‘rin olgan.