Baliqlarni nobud qilgan korxonaga 92 mln so‘m kompensatsiya hisoblandi

Ekopolitsiya ijtimoiy tarmoqlarda tarqalgan Zangiota tumanidagi Achchisoy kanalida baliqlar nobud bo‘layotgani aks etgan video bo‘yicha o‘rganish olib bordi.

Qayd etilishicha, o‘rganishlar davomida Zangiota tumani «Ittifoqchi» mahallasida faoliyat yuritib kelayotgan “Damachi baliq” MChJga qarashli baliqchilik ko‘lida suv sathi pasaytirilgani sababli baliqlarda kislorod yetishmasligi yuzaga kelib, 200–300 grammli baliqlar nobud bo‘lganligi aniqlandi.

Nobud bo‘lgan baliqlar jamiyat ishchisi tomonidan tozalanib, tuman hududidan oqib o‘tgan Achchisoy kanaliga oqizib yuborilgan.

Jamiyat faoliyati natijasida hosil bo‘layotgan oqova suvlardan namunalar olinib, atrof-muhitga ta’sirini aniqlash maqsadida o‘rganilganida, azot ammoniy miqdori belgilangan me’yordan 1,7 barobar, azot nitrit 1,95 barobar, quruq qoldiq 1,28 barobar hamda umumiy fosfor 1,8 barobar ortiq ekanligi aniqlandi.

Holat bo‘yicha korxonaga 92 mln so‘m miqdorida kompensatsiya hisoblandi, mas’ullarga nisbatan ma’muriy bayonnoma rasmiylashtirilib, holat qayta takrorlanmasligi bo‘yicha majburiy ko‘rsatmalar berildi. Shuningdek, kanal nobud bo‘lgan baliqlardan tozalandi.