Toshkent viloyatida yuk mashinasi ko‘prikka urildi

Toshkent viloyati Zangiota tumanida yuk mashinasi ko‘prikka urildi, deya xabar bermoqda viloyat Yo‘l harakati xavfsizligi boshqarmasi matbuot xizmati.

26 sentabr kuni soat 19:00 atrofida M.S. boshqaruvidagi MAN yuk avtomobili Zangiota tumanidan o‘tuvchi M39 yo‘lidagi yerosti yo‘lida tegishli taqiqlovchi yo‘l belgilari o‘rnatilganiga qaramasdan harakatlangan. Biroq gabarit o‘lchamlari to‘g‘ri kelmagani sababli ko‘prikning piyodalar harakatlanishi uchun mo‘ljallangan qismidagi beton to‘singa urilgan.

Shundan so‘ng voqea joyiga YHX hodimlari yetib kelib, yuzaga kelgan holatni bartaraf qilgan. Bir muddat avtomobillarning harakatlanishi cheklangan.

«Voqea harakat ishtirokchilarining sog‘lig‘iga va ko‘prikning avtomobillar harakatlanish uchun mo‘ljallangan qismiga ziyon yetkazmagan. Faqatgina ko‘prikning piyodalar harakati uchun mo‘ljallangan qismi shikastlangan», – deyiladi xabarda.

Hozirda shikastlangan qismni ta’mirlash choralari ko‘rilmoqda.

Holat yuzasidan Zangiota tumani YHXB tomonidan surishtiruv ishlari olib borilmoqda.