Putin O‘zbekiston bosh prokurorini «Do‘stlik» ordeni bilan taqdirladi

Nig‘matilla Yo‘ldoshevning «MDH makonida qonuniylik, huquq-tartibotni mustahkamlash, fuqarolar huquqlarini himoya qilish, prokuraturalararo hamkorlikni rivojlantirishga qo‘shgan ulkan hissasi» e’tirof etildi.

Foto: Bosh prokuratura

Rossiya prezidenti Vladimir Putin O‘zbekiston bosh prokurori Nig‘matilla Yo‘ldoshevni «Do‘stlik» ordeni bilan mukofotlash to‘g‘risidagi farmonni imzoladi.

Shu tariqa, Rossiya rahbari Yo‘ldoshevning «MDH makonida qonuniylik, huquq-tartibotni mustahkamlash, fuqarolar huquqlarini himoya qilish, ikki tomonlama va ko‘p tomonlama shakllarda prokuraturalararo hamkorlikni rivojlantirish, shuningdek, Rossiya bilan strategik sheriklikni yo‘lga qo‘yishga qo‘shgan ulkan hissasini» qayd etdi.

Nig‘matilla Yo‘ldoshev 2019 yildan buyon O‘zbekiston Bosh prokuraturasiga rahbarlik qilib kelmoqda. 2024 yil iyun oyida u ushbu lavozimga qayta saylandi.

Rossiyaning «Do‘stlik» ordeni 1994 yilda ta’sis etilgan. U bilan Rossiya Federatsiyasi fuqarolari va xorijliklar xalqlar o‘rtasidagi hamkorlik va o‘zaro tushunishni mustahkamlashga qo‘shgan hissasi uchun taqdirlanadi.

Eslatib o‘tamiz, avvalroq Putin Farruh Zokirov va Sevara Nazarxonni ham «Do‘stlik» ordeni bilan taqdirlagandi.

Tayyorlagan: Сардор Юсупов

#Rossiya #Vladimir Putin #Nig‘matilla Yo‘ldoshev