Xarid cheklaridan to‘lanadigan keshbek miqdori cheklandi

Endilikda bir fuqaro oyiga maksimal 204 ming so‘m keshbek ola oladi. Korporativ kartalar orqali sotib olinadigan tovarlar uchun keshbek berish bekor qilindi.

Foto: Soliq qo‘mitasi

Bugun, 10 yanvar kuni imzolangan prezident qarori bilan, fuqarolarga xarid cheklari summasining 1 foizini qaytarish tartibiga o‘zgarishlar kiritildi.

2024 yil 1 yanvardan boshlab, jismoniy shaxslarga xarid summasidan 1 foiz keshbek olishda xarid summasiga chegaraviy miqdor o‘rnatildi. Bu miqdor 60 BHMga teng bo‘lib, hozirgi kunda 20,4 mln so‘mni tashkil etadi.

Korporativ kartalar orqali sotib olinadigan tovarlar uchun keshbek berish bekor qilindi.

Xarid chekida bank kartasi turini (korporativ yoki shaxsiy) ko‘rsatish shartligi belgilandi.

Eslatib o‘tamiz, xarid cheklaridan 1 foizlik keshbek qaytarish 2022 yil 1 yanvardan boshlangan edi.

2023 yilda Soliq ilovasidan keshbek olish maqsadida foydalanish uchun yuzni skanerlash (Face ID) talabi kiritilgandi.